Os segundos suplentes constitúen a mesa electoral de Chavín ao non comparecer nin os titulares nin os tres primeiros suplentes
A MariÑA
Arrincan en 103 mesas as votacións nas que 67.430 mariñáns deciden hoxe o próximo goberno da Xunta; os máis madrugadores á hora de votar en Burela foron os mozos e en Viveiro algún ciclista
18 feb 2024 . Actualizado ás 11:52 h.Ás nove en punto da mañá deste domingo, 18 de febreiro, estaban xa constituídas as 103 mesas electorais nas que 67.430 mariñáns poden emitir o voto para decidir cal será o próximo goberno da Xunta. Segundo información facilitada pola Xunta Electoral de Mondoñedo , a xornada arrincou sen incidencias de importancia. Con todo, na mesa electoral de Chavín, situada na antiga escola desta parroquia de Viveiro, vivíronse momentos de relativa tensión posto que non compareceron os tres titulares (presidente e dous vogais) nin os tres primeiros suplentes. Finalmente, a mesa puido comezar a funcionar cos segundos suplentes.
Os máis madrugadores á hora de votar en Burela foron os mozos, que mesmo estaban a agardar á porta do colexio electoral a que abrise. En Viveiro algún ciclista que, seguro, ía facer deporte.
Por concellos, Viveiro sitúase á cabeza da comarca en número de electores (máis de 14.230, dos que 12.266 poderán votar nas urnas e preto de 2.000 residen no estranxeiro) e 20 mesas de votación. No resto da Mariña occidental, O Vicedo ten habilitadas 2 mesas (1.429 electores no municipio e 455 fose), Xove 5 (2.648 electores no municipio e 368 no exterior), Cervo 8 (3.598 residentes no municipio e 428 no estranxeiro) e Ourol 3 (862 no concello e 577 noutros países).
Tamén funcionan con normalidade desde as 09.00 horas os colexios electorais da Mariña central (hai 39 mesas) e A Mariña oriental (26 mesas). En detalle, na primeira comarca foron constituídas 10 mesas en Burela (6.989 electores no concello e 133 no exterior), 15 en Foz (máis de 8.200 electores no municipio e 821 residentes fose), 3 en Alfoz (1.415 veciños con dereito a voto no municipio e 425 fose), 4 en Lourenzá (1.705 e 744), 4 en Mondoñedo (2.924 e 1.413) e 3 no Valadouro (1.594 e 217).
Na Mariña oriental operan 4 mesas electorais na Pontenova (1.849 residentes no municipio e 600 fose), 5 en Barreiros (2.95 por 418), 15 en Ribadeo (7.991 e 1.451 no exterior) e 2 en Trabada (973 e 327).
Unhas eleccións nas que A Mariña terá un protagonismo destacado, posto varios mariñáns concorren aos comicios autonómicos en postos destacados. No Partido Popular, a lista da provincia é encabezada por Elena Candia López, que foi alcaldesa de Mondoñedo e presidenta da Deputación. No número 3 sitúase Alfonso Villares Bermúdez, exacalde de Cervo e exvicepresidente da Federación Galega de Municipios e Provincias (Fegamp) e conselleiro do Mar en funcións.
Na candidatura do BNG vai como número 2 o ribadense Daniel Castro García, que xa foi deputado na anterior lexislatura, así como Iria Cotelo Cociña, actual concelleira de Mercados en Viveiro.
A número 2 do PSOE é Lara Méndez López, natural de Cervo e anterior alcaldesa de Lugo; mentres que a número 3 é Mayra García Bermúdez, exalcaldesa de Trabada.