Máis de 67.400 mariñáns poden votar nas autonómicas de este domingo

Un total de 67.430 mariñáns están convocados ás urnas este domingo 18 de febreiro do 2024, cando serán elixidos os 75 deputados que darán forma á duodécima lexislatura do Parlamento de Galicia. Son 818 menos que nos anteriores comicios autonómicos, celebrados en xullo do 2020, en plena pandemia do covid, e cando, segundo datos do Instituto Nacional de Estatística, foran convocados 68.248 mariñáns.

Do total de electores actuais, 57.067 residen nalgún dos 15 municipios da Mariña, mentres que 10.363 fano no estranxeiro, en base aos datos do Censo Electoral de Residentes no Estranxeiro (Cera). Por municipios, Viveiro sitúase á cabeza da comarca, con 14.238 electores; seguido de Ribadeo , que ten 9.442, e de Foz , que acada os 9.072. O seguinte concello en número de persoas con dereito a voto nas eleccións nas que se decidirá quen é o próximo presidente da Xunta de Galicia é Burela, con 7.123. Mondoñedo ten tamén un gran peso, con 4.337, mentres que Cervo se sitúa en 4.026.

Xove, con 3.015, e Barreiros, con 3.013, manexan cifras similares, mentres que con máis de 2.000 electores figuran tamén: Lourenzá e A Pontenova. Os dous municipios convocaron para este domingo a 2.449 persoas. Por amais de mil están varios dos concellos menos poboados, como Trabada (1.300) Ourol (1.437), O Valadouro (1.811), Alfoz (1.840) ou O Vicedo (1.878). Nunha comarca onde moita xente tivo que emigrar, tanto no século pasado como no actual, o potencial dos electores residentes no estranxeiro é elevado. En detalle, máis do 15% dos mariñáns que poderán escoller unha papeleta ao parlamento galego viven noutros países, segundo os informes do Instituto Nacional de Estatística.

 Votantes do CERA

Deles, 1.986 son de Viveiro; 1.451 de Ribadeo e 1.413 de Mondoñedo. Foz, Lourenzá e A Pontenova, con 821, 744 e 600 censados no CERA respectivamente; ademais de Ourol, con 577, tamén se emprazan nos primeiros postos do voto emigrante na comarca.

---

---

---