A Garda Civil pon o ollo nos grupos de wasap que advirten de controis policiais

A existencia de grupos de wasap moi activos que advirten da localización de controis de tráfico preocupa á Garda Civil, porque aínda sendo unha actividade lícita (aínda que hai dúbidas e interpretacións respecto diso, non está tipificado especificamente como delito nin no ámbito penal nin no administrativo) constitúe un problema non tanto de seguridade viaria como de seguridade cidadá, porque ao sinalar a localización dos axentes á vez que se prevén aos condutores faise tamén a aqueles que poderían estar cometendo outro tipo de delitos, por exemplo, o transporte de droga. Deste xeito, xente que actúa con boa intención nos grupos de wasap estaría xerando un efecto indesexable.

«Na Mariña e pola provincia hai varios grupos, que non son soamente utilizados para advertir de accidentes ou incidencias nas estradas, como pode ser a aplicación social drive, senón tamén da localización de controis policiais. Esta información non a usa só o condutor que, por exemplo, ten a ITV caducada ou o que non se pon o cinto de seguridade, senón delincuentes que, sen ir máis lonxe, transportan droga, que se evitan ter que levar un coche lanzadeira ou teñen este servizo a maiores como información adicional. Por esta zona hai grupos que practican carreiras ilegais, que son os que máis nutren de información estes grupos de wasap, algúns dos cales exceden os 250 membros e que están divididos por comarcas, Terra Chá, A Mariña oriental, central e occidental...», sinalan as fontes consultadas.

Explican tamén que teñen unha xerga propia, por exemplo, referíndose aos controis como puntos verdes. «Que pasa? Que a maior parte dos que integran estes grupos ignoran, non se están dando conta, de que están a beneficiar a outros delincuentes. A semana pasada pasou pola A-8 un tipo con dous quilos de cocaína...».

«Non estamos a falar do simpático que queira ir mais rápido porque teña que chegar de Oviedo a Lugo en menos tempo. O grave é a información que se pon aí. O que ocorre é que non está tipificado como delito, máis aló de que che collan usando o móbil», explican as fontes referidas.

Así, se antes se daban luces para advertir dos controis, agora mándanse mensaxes aos grupos de wasap. Iso implicou que tamén se estean facendo cambios nos dispositivos que monta a Garda Civil, que se fan máis dinámicos, pero inevitablemente, tamén menos efectivos para evitar e combater delitos.

E conclúen: «As autoridades están sobre eles, pero ao non ser delito é complicado actuar. O que queda é concienciar á xente, porque seguro que moitos dos que forman parte destes grupos, falamos por exemplo dun que se move pola zona de Ribadeo; outro polo conxunto da Mariña; outro pola Pontenova, Meira, Riotorto e Trabada; outro por Mondoñedo, Riotorto, Abadín e Pastoriza, e outro por Lugo centro norte, se son conscientes do mal que poden facer probablemente deixarían de participar».

---

---

---