O freo á construción segue na Mariña, con 65 obras novas nun ano

Que o sector da construción a gran escala na Mariña continúa freado é unha percepción que confirma o informe máis recente sobre a evolución da actividade da construción e rehabilitación de edificios residenciais e non residenciais publicado recentemente polo Instituto Galego de Estatística (IGE). En base a ese estudo, no 2022, último exercicio do que existen datos globais, na comarca mariñá unicamente solicitáronse un total de 65 licenzas de nova planta. Á cabeza situouse Barreiros, con 22 permisos concedidos, seguido de Ribadeo , con 14; Foz, con 8 e Viveiro con 7. Menos movemento houbo aínda na Pontenova, onde unicamente se pediron 3 licenzas; ou Alfoz e Xove, con 2 en cada un destes municipios. No Vicedo e Mondoñedo tramitouse 1 licenza en cada caso, mentres que en Trabada , O Valadouro, Burela e Alfoz.

E mentres a construción de vivendas e edificios novos segue parada, a rehabilitación de inmobles ten máis peso neste momento. Deste xeito, ao longo do 2022, en toda A Mariña tramitáronse un total de 106 licenzas para restaurar ou arranxar inmobles xa existentes. Nalgúns casos levou a cabo unha demolición parcial previa, mentres que noutros a demolición foi total e noutros non foi necesario realizar esta actuación. Dous dos municipios con maior proxección demográfica, Viveiro e Ribadeo, concederon o maior número de licenzas deste tipo.

Rehabilitacións en Viveiro

En detalle, na cidade do Landro houbo 32, mentres que en Ribadeo se asinaron 26. Por detrás situáronse Burela e A Pontenova, onde levaron a cabo 9 rehabilitacións. En Cervo e Trabada houbo 7, mentres que en Barreiros e Foz os técnicos analizaron e deron o visto e prace a 3. En Mondoñedo, Lourenzá, Ourol e Alfoz houbo dous. Finalmente, en Xove non se produciu ningunha rehabilitación, segundo o citado informe do IGE.

---

---

---