Axentes que interviñeron na investigación, un amigo da vítima, unha coñecida do acusado e unha veciña da Pobra. Esas son as persoas que están chamadas a participar na quinta xornada do xuízo polo crime de Diana Quer.
18 novs 2019 . Actualizado ás 13:53 h.Completáronse xa cinco sesións do xuízo polo crime de Diana Quer, arroupadas tamén por unha concentración en Compostela pola moza madrileña asasinada. Estas son algunhas das imaxes que resumen estes días intensos.
Conclúe a quinta sesión do xuízo polo crime de Diana Quer. Mañá regresamos coa sexta sesión, que está prevista para as 9.30 horas, cando comezarán a comparecer os forenses.
Comparece outra muller, a petición da defensa, que denunciou naquelas datas que un home se dirixiu a ela como "moza, ven aquí". Destaca que non ten nada que ver co caso.
Nova testemuña. Unha veciña da Pobra do Caramiñal afirma que naquelas datas tivo un incidente cun home duns 30 anos, de orixe magrebí, que se dirixía a elas como "morena, ven aquí".
O segundo axente da Garda Civil afirma que traballa con bridas, e que a que saíu co corpo de Diana era dun só uso e duns 60 centímetros de longo. "Unha vez que se pecha non hai volta atrás, para liberala hai que cortala", afirma. "Había un bo guecho de pelo que pasaba polo interior da brida", defende ante unha das preguntas da defensa de Abuín. Pecha así a súa comparecencia o funcionario do Instituto Armado.
O segundo axente da Garda Civil segue explicando como foi a noite que atoparon o corpo. Afirma que aquel o Chicle se mostrou "indiferente" e que coñecía á perfección a nave.
Comeza a falar o outro axente da Garda Civil que participou no levantamento do cadáver de Diana Quer. Afirma tamén que o corpo emerxeu: "totalmente espido". Defende que estaba presente a autoridade xudicial e o acusado.
Un amigo de Diana Quer é a segunda testemuña da quinta xornada. Afirmou que falou coa novo días antes da desaparición e que lle dixo que quería volver a Madrid.
O axente da Policía Xudicial da Coruña da Garda Civil rematou a súa comparecencia unha hora e media despois. Pecha asegurando que o tanga atopado tiña arenilla e que estaba enteiro. Tamén repetiu que o lazo que unía os bloques tiña como fin controlar o peso e non reducir o tamaño do cable.
Fernanda Álvarez segue interrogando ao axente que participou no levantamento de cadáver. Pregunta agora por que non se analizou a cinta adhesiva que se atopou no pozo, ao que o garda civil responde que estaba completamente degradada.
A avogada do Chicle insiste en se o pelo de Diana estaba pegado ao cranio. O axente confesa que estaba separado, aínda que o cabelo si estaba pegado a anacos de coiro cabeludo. Esta cuestión é clave para saber se a brida puido enredarse ao xeito accidentalmente.
O axente da Policía Xudicial que se encargou de facer o levantamento do corpo afirma que o Chicle lles comentou cales eran as dimensións do soto. Destaca que lle sorprendeu a súa frialdade á hora de facelo e que divagó durante a reconstrución.
O axente responde agora á letrada do Chicle. Segue defendendo que non había luz no interior da nave e que atoparon marcas de pneumáticos nunha segunda inspección. Afirma tamén que o corpo cabía pola tapa pequena, de 45 por 45 centímetros.
A primeira testemuña confesa que o "o corpo saíu totalmente espido". Responde agora ás cuestións da acusación particular, e volve incidir en que "necesitas luz, é inviable camiñar sen luz" na nave de Asados onde se atopou o corpo de Diana Quer.
O garda civil afirma que a brida, dun ancho duns 9 milímetros, tiña enganchado pelo de Diana: "o cabelo estaba por dentro". A fiscala preguntáballe se é posible que se enredase a brida accidentalmente: "É moi pouco probable, dubido moito que iso sexa así".
O funcionario explica que o nó practicado polo Chicle para unir os bloques tiña un lazo que "non é moi común" e cuxa finalidade é "ter o control do peso dos dous bloques antes de deixalos caer [...] o lazo está feito para iso".
A fiscala pregúntalle polos outros dous bloques que se atoparon no seu interior e o axente asegura que tamén poderían usarse para intentar lastrar o corpo de Diana, pero que lle faltaba "o lazo que se deixa para ter o control".
O axente di que o cable "foi cortado en todos os seus extremos", versión que tamén choca coa do Chicle, que afirmou que o arrincou.
A testemuña conta que atoparon catro obxectos flotando no pozo. "O bolso estaba aberto", polo que puideron saír do seu interior, asegura. Tamén acharon dous anacos de cinta adhesiva duns 50 centímetros cada un e un tanga no fondo do alxibe. O axente explica que había dous bloques conectados por un cable de datos que lastraban o corpo de Diana, así como outros dous unidos por un electricidade.
O axente asegura que necesitaron luz artificial para moverse polo interior da nave, versión que choca coa do Chicle, quen dixo que non a necesitou aquela noite de 22 de agosto do 2016. O funcionario afirma que se puido introducir a Diana pola arqueta forzando o rigor post mortem: "Se vences esa rixidez si que a podería meter por aí".
A primeira testemuña é un axente da Garda Civil da Policía Xudicial da Coruña que se encargou do levantamento do corpo. Explica como foi o procedemento, que comezou ás 3:40 horas.
Juan Carlos Quer chegou á sede santiaguesa da Audiencia Provincial da Coruña sen a súa filla Valeria. A moza xa se mostrou moi afectada a semana pasada, chegando a saír en varias ocasións da sala.
Decenas de persoas uníronse este sábado a Juan Carlos Quer e Valeria Quer no minuto de silencio que celebraron na praza do Obradoiro.
Compartimos o resumo do que ocorreu durante a primeira semana. O Chicle, que presentou a súa versión o martes, viu como as múltiples testemuñas que xa pasaron pola sala han ir dinamitando as súas coartadas.
O xuízo polo crime de Diana Quer encara hoxe a súa quinta sesión, que seguiremos en directo. As partes están chamadas para as 9:30 horas. Entre as testemuñas atópanse varios axentes da Garda Civil que participaron na investigación, así como unha coñecida do Chicle, un amigo de Diana Quer e unha veciña da Pobra do Caramiñal.