Xa están a pensar en arrincar a autocaravana de novo. En xaneiro saíron de Galicia e o covid sorprendeunos en Portugal. O seu obxectivo era ser guías dunha excursión por Marrocos, pero suspendeuse. Cando puideron desprazarse fóronse cara a Escandinavia e percorreron media Europa. Agora, dez meses despois, acaban de chegar a Galicia máis que nada para que as súas respectivas familias vexan á súa filla, que en xaneiro cumpre tres anos e pasa máis tempo como unha seda que cos pés en terras galegas. «Seguimos na aventura, aínda que pendentes das restricións polo coronavirus para poder planificar as rutas», comenta César Pou. Ten 35 anos e fai tres traballaba de visitador médico. A súa muller, Déborah Rodríguez, de 40, era responsable dun recinto deportivo e por aquel entón estaba embarazada de Siena. Pouco despois de nacer a pequena deixaron os seus respectivos traballos e emprenderon unha viaxe que xa lles levou por máis de 40 países. Deixárono todo para vivir viaxando. «Siena coñécese todos os parques infantís de Europa», comenta César riseiro.
EDUCACIÓN DIFERENTE
«Lévao ben, a autocaravana é a súa casa, ten o seu cuarto e xoga con outros nenos cando estamos en cámpings. De feito dáselle ben o inglés porque non lle queda máis remedio para relacionarse. Chegará un día, cando pola idade a escolarización sexa obrigatoria, que teñamos que proporcionarlle unha vida máis tradicional, como a que leva todo o mundo. Pero está coñecendo outras culturas, nenos que sen ter nada material son felices, persoas diferentes... É unha aprendizaxe que agardemos que quede», reflexiona o pai desta pequena que foi bautizada co nome dun lugar da Toscana italiana que fascinou aos seus aventureiros pais. Unha familia que o deixou todo para vivir viaxando.
VIAXES LOST PLANET
Explícame os servizos que ofrecen na súa web www.viajeslostplanet.com. «Somos intermediarios. Traballamos con provedores dos cinco continentes para persoas que queren alugar unha autocaravana, por exemplo, en Nova Zelandia. Tamén contamos cun produto propio, que son as nosas rutas nas que acompañamos a grupos pequenos de catro ou cinco vehículos. Por desgraza tivemos moitas cancelacións e estamos pendentes de como evoluciona a pandemia. E outra parte é o blogue onde subimos información e vídeos desde un dron para xente que queira ir soa. Temos que viaxar constantemente para preparar novas rutas. Se en Nadal nos sae a de Marrocos pasaremos as festas fóra», comenta.
O seu pai xa tiña unha Camper, transmitiulle a afección ao fillo, e agora César converteu a que era a súa principal afección cando tiña vacacións no auténtico modo de vida da familia. Agora mesmo están en Galicia, pero deica pouco César, Déborah e a pequena Siena marcharanse de viaxe ata sabe Divos cando. Un xeito diferente de vivir.