QUERERÍAS IR? Cervexas, bolígrafos e mesmo uns Doritos só para mulleres son a proba dunha tendencia que agora chega aos hoteis. En España o primeiro aloxamento feminino acaba de abrir en Mallorca
06 jul 2019 . Actualizado ás 05:00 h.Aquí non poden entrar homes, polo menos como clientes. O aloxamento que a cadea mallorquina Som Hotels acaba de abrir en Manacor (Mallorca) é só para mulleres. E por que é exclusivo do xénero feminino? A resposta tena Joan Enric Capellà, responsable do grupo que indica que a idea que por fin se fixo realidade comezou a xestarse no 2016.
«Vimos unha tendencia no mercado e é que cada vez se ofrecían máis produtos só para o xénero feminino e por iso decidimos apostar por este concepto», explica Joan Enric, que engade: «Se nalgún momento tamén se sitúan produtos só para homes tamén o valoraremos, por suposto». Por agora este aloxamento mallorquino é o único do país no que só poden aloxarse mulleres. E os nenos? «Só poden vir nenas a partir de 14 anos».
Masaxes e terapias
Este hotel de catro estrelas abriu as súas portas o pasado 14 de xuño e de momento está sendo un éxito. «Agora mesmo estamos completos, pero aínda é moi pronto para facer unha valoración», confesa. Un dos puntos fortes do aloxamento é a súa localización. «Está nun sitio verde, nunha zona con moito bosque, en Manacor. Ademais é un hotel boutique con 39 cuartos para fomentar a tranquilidade». Porque a espiña dorsal do complexo hostaleiro é o wellness. «Nesa liña ofrecemos un amplo abano de servizos en canto a tratamentos, masaxes e terapias. Despois tamén temos actividades como ioga, pilates e similares orientadas ao Mens sanda in corporesan . Do mesmo xeito aproveitando que estamos nunha contorna boscoso organizamos excursións de sendeirismo», aclara Joan Enric.
En canto á decoración, desde Som Hotels indican que todo está pensado por e para mulleres. «Puxemos á fronte a un equipo composto integramente por mulleres. Unha arquitecta, unha interiorista, unha supervisora enxeñeira... Non queriamos facer un produto condicionado por pensalo desde unha óptica non adecuada», di. O resultado é un espazo no que predominan as liñas curvas fronte ás rectas. «As rectas son máis duras e as curvas máis doces e casan mellor co concepto».
Á hora de elixir a cor, un podería agardarse que a cadea optase polo típico rosa, pero aquí queda claro que o deseño está en mans de mulleres porque o hotel se afasta dese tópico sexista. «O que si utilizamos moito é a gama do vermello», aclara. Outro dos detalles nos que se evidencia o toque feminino está dentro de cada cuarto. «Decidimos prestar unha atención especial á zona do tocador polo que puxemos un espazo máis amplo na zona do espello», di o responsable. O resto de servizos seguen a liña da idea central de ofrecer unha contorna tranquila no que as mulleres poidan desconectar de todo.
Proba de que a idea de crear espazos exclusivamente femininos é tendencia é que a cadea Leonardo Hotels, que abrirá o seu primeiro aloxamento en España en Barcelona, incluirá un cuarto deseñado para mulleres de negocios con todas as comodidades para relaxarse despois dunha día de traballo con detalles como albornoces suaves, flores frescas e accesorios premium. Está moda lévanos a unha pregunta, os homes non nos permiten descansar?
