Que se prepare Vigo porque o 17 de maio sumará dous alcaldes. Ese día presenta Raúl Pérez o seu «Raulidad Virtual» e se nada torcer, Caballero estará con el: «Xa me prometeu unha concellaría», chancea
23 mares 2019 . Actualizado ás 22:32 h.1 Foi moi doado imitar a Abel Caballero?
O proceso cando imito a un personaxe é sempre o mesmo: empézome a fixar nalgunha cousa significativa que teña el. E é verdade que Abel Caballero non é dos máis difíciles, vinme moitos vídeos seus, e é un político, un alcalde, que traslada o seu bo rolo sempre. Notouse co tema das luces de Vigo, cos millóns de leds. Por aí fun. E creo que é unha persoa que cae moi ben.
2 Ti pillácheslle ben o punto...
El di as cousas con medio sorriso sempre, está contento sempre, e cando fala inglés [imítao] é xenial. De súpeto cambia de ton, sobe e baixa, iso agradécese.
3 Xa viñeches a Vigo?
Estiven moitas veces e en maio vou co meu show, Raulidad virtual. E agardo que o alcalde e eu fagamos unha actuación estelar porque a ocasión o merece; o 17 de maio estaremos os dous no meu show xuntos e será apoteósico.
4 Ademais el vai estar en campaña.
¡Que mellor colofón! Eu vexo ese dúo, Abel Abel, que parece unha canción de Mecano [ri]. Será épico, os Caballero de Vigo.
5 E que che resulta máis difícil á hora de imitalo?
Creo que vocalmente téñoo controlado, pero o swish, swish non me sae como a el. É que bailalo como Caballero é imposible, ninguén o consegue. Hai xente que se rompeu a cadeira imitándoo [risos], ninguén ten esa expresividade. Ti a Caballero dáslle un móbil e cárgao, ten unha enerxía brutal. Abel está moi motivado sempre, moi arriba, moi contento por todo. Iso á hora de imitalo é unha vantaxe, pero desgasta.
6 Quedas esgotado despois de ser Abel?
É coma se levase un mes no ximnasio [risos]. Perdo moitas calorías.
7 Cando falaches con el, que che dixo?
Que estaba encantado, tiña algunha referencia dos meus vídeos e da imitación. Foi moi amable e xa quedamos en pór o ano que vén 18 millóns de leds entre os dous, e falamos de que nos atopariamos en maio.
8 ¡En maio que se prepare Vigo!
Si, que se preparen. Teñen que saír á rúa con lentes, seguro (con tantas lámpadas), polo si ou polo non. Ímolo encher de colorido.
9 E como acaba unha persoa que fixo Telecomunicacións facendo estes shows?
Non o sei [risos]. Vocacional é, pero descubrino bastante tarde, de pequeno era moi tímido, moi apocado. A universidade axudoume co grupo de teatro, pero o certo é que isto me gusta moito máis que Telecomunicacións.
10 Que personaxe custouche máis facer?
Hai algúns que tiven que deixar, pasoume con Iñaki Gabilondo, aparteino porque non podía, e agora volvín e xa ben. Pásame ultimamente con Albert Rivera, que me custa.
11 Oe, estás a darlle moita publicidade a Caballero, algo terás que rascar, non?
Na radio el xa me ofreceu a concellaría, así que a Concellaría de Imitación xa é miña [risos].