O equipo tivo un xesto co Atlántida de Matamá que foi aplaudido por equípolle local e a súa afección
19 novs 2019 . Actualizado ás 05:00 h.O Atlántida de Matamá facía público onte a través das redes sociais un xesto que tivo con eles o Balaídos nun partido que enfrontou esta fin de semana aos seus respectivos equipos cadetes. Explicaban que aos cinco minutos produciuse unha falta clara ao porteiro do Matamá (que exercía como local), que acabou sendo substituído co beizo inchado. Nese momento quedou tendido no chan e o árbitro non accedeu a parar o partido, de modo que continuou a xogada e o dianteiro visitante marcou o gol que supuña o 0-2.
A continuación, e en vista do xeito en que subira ese segundo gol ao marcador, o adestrador do Balaídos, Eduardo Ramos, indicou aos seus futbolistas que se deixasen marcar un gol, o 1-2. «Foi un xesto de fair play que cada vez se mira menos. Ou resultado é ou de menos, ou importante e que estamos a formar persoas, e hai que ensinarlles que non vale todo», expresaba o Matamá.
Da mesma opinión é Ramos, que non dubidou respecto de como actuar. «Sobre todo somos persoas e iso é o máis importante. Non é algo que tivésemos falado para situacións así, pero si que temos claro que podemos xogar mellor ou peor e gañar ou perder, pero as normas da deportividade son o primeiro», debulla. Os seus xogadores reaccionaron ben, di, a un par deles estrañoulles, pero non puxeron obxeccións. «O adestrador rival agradeceuno e un afeccionado achegouse a dicirnos que eses si eran valores», conta.