Ratificada unha multa de 19.000 euros ao Concello de Vigo por falta de control na calidade da auga
VIGO CIDADE
As relacións entre o goberno municipal vigués e a Xunta comezan co mesmo grao de enfrontamento co que acabaron no anterior mandato municipal. O Concello de Vigo terá que afrontar unha multa de 19.030 euros por «incumprimentos reiterados» no control da calidade da auga para o consumo humano, segundo desvelou onte a delegación da Xunta na cidade olívica.
A sanción fora imposta en xaneiro do ano pasado pola Consellería de Sanidade ao Concello tras a polémica suscitada entre as administracións local e autonómica sobre a idoneidade do servizo público de abastecemento de auga.
Segundo sinala a Xunta, o xulgado dos contencioso administrativo número 1 de Vigo estima como adecuada a sanción do Executivo de Núñez Feijoo ao constatar unha «repetida falta de control exixible no funcionamento do servizo por parte do Concello como responsable», que se traduce nun «risco sanitario para os consumidores, xa que se descoñece a aptitude da auga».
O expediente sancionador contra o Concello impulsado por Sanidade confirma, segundo a interpretación da delegación local da Xunta, a comisión de tres infraccións de carácter grave e unha leve: a ausencia de certificación ou acreditación do laboratorio municipal; por falta de determinación de metais nas analíticas de control; pola ausencia de notificación á autoridade sanitaria dos supostos constatados de auga non apta para o consumo, e a de menos gravidade, a que sanciona a non suministración de datos ao Sistema de Información Nacional de Auga de Consumo.
O Concello ten, iso si, quince días para interpor un recurso de apelación contra a sentenza, que dá a razón ao litixio interposto pola Xunta por deficiencias nos controis do laboratorio municipal e, en definitiva, no control da calidade da auga.
A Consellería de Sanidade subliñou no seu expediente que entre 2016 e 2017 detectáronse en 24 análises deficiencias que consecuentemente guindaron un resultado de auga non apta.
O PP e o seu novo portavoz municipal, Alfonso Marnotes, reaccionaron onte de inmediato para urxir ao goberno de Abel Caballero a «tomar medidas para garantir a calidade da auga que beben os vigueses». O novo líder popular demanda maior transparencia na xestión da auga, á vez que se pon como reto «traballar xuntos» para mellorar os servizos públicos.