O automodelismo pelexa para poder converterse dunha vez nunha federación deportiva
20 abr 2019 . Actualizado ás 09:17 h.Fernando meteuse neste mundo por prescrición médica. «O doutor díxome que necesitaba algún hobby para desconectar do traballo. E a miña ilusión desde neno sempre foi ter un coche teledirixido, pero maldita a hora na que se me ocorreu achegarme ao circuíto que había en Fontecarmoa. A partir de aí, estamos a falar do ano 92 máis ou menos, xa foi un enganche total», chancea. Porque aquela pequena incursión naquel pequeno circuíto que xa non existe derivou en que este vilagarcián sexa xa todo un friki deste mundo. Un friki e, agora mesmo, o director deportivo da asociación española de pilotos de automodelismo. Unha asociación que está a pelexar por converterse en federación e desligarse dese nó que lle provoca a de Automobilismo, que máis que axudarlles afógalles.
Daquela máxica receita que lle recetó o doutor quedan como pouso no vaso innumerables cargos, que aos poucos lle levaron crecendo ata converterse no director deportivo da asociación nacional. «Rematei como delegado rexional da categoría durante oito anos, desde o 2008 ata o 2015, e agora levo catro anos como secretario da asociación española de coche de radiocontrol, e desde o ano pasado como director deportivo», explica. Bo, e quedan tamén polo camiño moitos coches -«mellor non lembrar cantos, porque se non a miña muller me mata», chancea- e innumerables amigos, porque esa é unha das cousas coas que queda Fernando. Aos poucos a afección por este deporte vai a máis. Os seus usuarios, cunha media de idade que anda pola corentena, van buscando substitución nos seus fillos e a cousa parece callar. «Ao principio custounos, pero agora xa hai moitos pais que veñen ás probas para facer de mecánicos dos seus fillos. E aos rapaces gústalles. A final de contas, isto é como un videoxogo, pero en vivo e en directo», resume Fernando Abalo.
O automodelismo, sen dúbida, parece que crece, sobre todo na provincia de Pontevedra. O 50 % de quen o practican en toda Galicia, segundo os cálculos de Fernando, son pontevedreses. «E hai moita xente que vén ás carreiras pero que non está na asociación», insiste o vilagarcián.
Falemos de diñeiro. É caro ter un coche de radiocontrol? «Caro ou barato -contesta Fernando- é un concepto relativo que depende con que o compares. Si que é verdade que podes empezar dun xeito económico, con equipos de 400 ou 450 euros, que che poden servir para competir nos torneos sociais, pero tamén o é que cando che metes en serio, un coche de competición ten o seu prezo. Entre todos os seus elementos podemos estar a falar de mil ou mil douscentos euros sen problemas».
Pode parecer que o automodelismo é un deporte sinxelo, porque a final de contas todo o mundo tivo algunha vez algún mando dun coche teledirixido nas mans, pero non é o mesmo esquivar as pernas dos amigos que lidar coas curvas dun circuíto. «A esquerda e a dereita son unhas cando vas por unha banda do circuíto e outras cando volves. A habilidade cóllela adestrando», explica.
O nivel en Galicia é bo, en opinión do director deportivo da asociación española, pero «o problema é que a xente non se anima a pilotar fóra da comunidade. Aínda que é verdade que fomos un dos deportes aos que máis afectou a crise, porque, como falabamos antes, non é barato e nótase porque algo baixou a participación nas probas. Hei de dicir, con todo, que nos Campionatos de España sempre estamos a pelexar cos de arriba».
A importancia da mecánica
A comparación que fai Fernando do nivel dos pilotos galegos con respecto aos españois non é baladí porque en España hai unha decena de pilotos que son profesionais, que viven do automodelismo. Eles e os seus mecánicos, porque este é un deporte no que o compoñente mecánico é fundamental para conseguir bos resultados. «En España temos un campionato de Europa grazas á reposición. Todos enchían cada nove minutos e nós cada dez. E por iso gañamos», lembra
Que o automodelismo é un deporte que aos poucos vai crecendo aválao tamén o feito de que en Galicia teñan aparecido xa varias tendas especializadas. «Na provincia de Pontevedra hai dúas en Vigo e unha na Estrada», apunta Abalo. O ano pasado tramitáronse duascentas licenzas en toda Galicia e 110 foron de Pontevedra. E unha das vantaxes que ten é que non hai idade para practicalo. A pelexa agora céntrase en conseguir que os máis novos acudan. «Eu digo sempre que este é un deporte hereditario, no que os pais de 45 ou 50 anos fan de mecánicos dos seus fillos. Temos pilotos de 8 ou 9 anos», afirma Abalo.
«Prefiero no contar cuántos coches me he comprado, porque si no, mi mujer me mata»
«Este é un deporte hereditario, no que os pais acaban
de mecánicos
dos seus fillos»
1980
67