As aprehensións pasaron nun só ano de 1.806 quilos a case 216 toneladas
16 feb 2019 . Actualizado ás 05:00 h.En abril do pasado ano, o presidente da Asociación de Armadores de Cerco de Galicia (Acerga) denunciaba un suposto «exceso de celo» dos distintos corpos de inspección sobre a súa flota por mor de senllos erros coa anchoa e o chincho nas lonxas de Vigo e A Coruña. O certo é que as estatísticas do Servizo de Gardacostas reflicten un asombroso incremento, con respecto ao 2017, na cantidade de peixe e marisco comisado ao longo do pasado exercicio. Na zona da Coruña, en cuxa lonxa descargan todas as tarrafas de Malpica, figuran 207.368 quilos. Semellante cantidade só pode conseguirse con varios alixos de especies pelágicas, sobre todo se se ten en conta que o comisado o ano anterior suman apenas 1.200 quilos. Na zona da Costa da Morte, o incremento tamén é moi importante, xa que se pasou dos 1.606 quilos do 2017 aos 8.358 do pasado.
Ademais das accións do Servizo de Gardacostas, na comarca intervén habitualmente a Garda Civil. De feito, o último golpe importante ao furtivismo foi obra do Paprona de Corcubión. A finais de novembro interceptaron unha furgoneta que saía do porto de Fisterra con 400 quilos de centola viva, que foi devolta ao mar. Ademais, o mesmo día de Noiteboa localizaron outros 96 quilos da mesma especie, que eran de pequeno tamaño. O polbo e o xurelo son outras especies habituais de comiso na Costa da Morte.
A Costa da Morte é cumpridora se se compara con outras áreas de Galicia
Na Costa da Morte as accións ilegais a nivel pesqueiro e marisqueo son escasas se se comparan cos que ocorre no resto de Galicia. Tras a provincia de Lugo, a costa que vai de Malpica a Fisterra parece ser a que ten menos furtivismo e máis profesionais respectuosos coa lexislación e o medio ambiente.
Polo que se refire ás incautacións, na comarca houbo 775, unha cifra sensiblemente inferior ás máis de 5.000 que houbo na zona de San Vicente e a ría de Pontevedra ou as 4.224 de Arousa Sur. De Fisterra para abaixo, en cada tramo superaron as 3.000. As cantidades poden ser enganosas porque o Servizo de Gardacostas refírese ás incautacións por unidades e o mesmo conta un coche ou unha lancha que unha nasa ou un metro de aparello, pero a diferenza é tan grande que dá unha idea da conflitividade de cada unha das zonas. Ademais, houbo unha baixada importante con respecto ao 2017.
Mantéñense estables, con todo, as cifras das inspeccións. Na Costa da Morte, realizáronse medio milleiro, menos que en ningún outro lugar, o que podería explicar as escasas incautacións e infraccións rexistradas, pero tamén podería explicarse pola baixa conflitividade.
En canto ás infraccións tramitadas, a cantidade tamén é baixa e mantense case igual desde o 2017.
Polo que respecta ao furtivismo en praias e costas, a maior parte dos mariscadores participan en labores de vixilancia, aínda que iso adoita dar lugar a conflitos, no seo das agrupacións e cos que faenan sen carné. Con todo, hai anos que non hai incidentes. Tamén hai gardas en toda a costa.