Adrián Fuentes Fernández (Marín, 1983) tan só leva un ano a cargo de os fogóns do seu restaurante en Vigo . Un ano intenso no que decidiu arriscar cun modelo diferente. En Abisal , non hai unha carta ao uso, senón dous menús, durante a semana,- un de 18 euros e outro de 26- e tan só un, a fin de semana. Ademais, ese menú varía en función do que atope na praza ese día: «Non temos carta porque me parece moi aburrido. Hai veces que che apetece facer cousas máis clásicas e outras arriscar un pouco máis e ser máis innovador. A cociña é algo vivo e creo que iso hai que plasmalo. Que o que compras che diga como quere que o cociñes é o determinante. Para min iso tamén é liberdade», explica este novo cociñeiro, que se percorre as prazas de Vigo e concellos próximos en busca do mellor produto: «Levo moitos anos traballando deste xeito e para min o natural é facelo así», di.
Con esta filosofía, un pode ter a seguridade de que cando alguén entra en Abisal sempre hai sorpresas: «Igual non todo o menú é distinto, pero hai semanas que en tres días fago seis menús diferentes porque de súpeto se me enche o restaurante e téñome que ir de novo á praza e de volta no coche xa vou montando o menú na cabeza... Unha tolemia», explica Adrián Fuentes que recoñece que a axuda dos seus pais é fundamental en todo este proceso.
En canto ao seu nomeamento a cociñeiro revelación do Fórum Gastronómico, Adrián recoñece que a recibiu con sorpresa: «Iamos dar uns relatorios e xa para min era unha marabilla. Aos poucos días dixéronme que estaba nomeado[...] Levamos un ano aberto e é unha forma de darnos visibilidade. Estar nomeados para nós xa é gañar», confesa este cociñeiro que sabe moi ben o que quere ofrecer aos seus clientes: «Gústame que a miña cociña saiba a mar. E que o peixe estea fresco», recoñece.