Partirá ás 20 horas desde a Praza de España ata a Porta do Sol
21 ene 2019 . Actualizado ás 13:24 h.A xunta de persoal da EOXI de Vigo recibiu esta mañá o apoio do alcalde de Vigo para a manifestación que se celebrará o xoves ás oito da tarde para demandar melloras na atención sanitaria. Partirá desde a Praza de España ata a Porta do Sol. A delegada de Comisións Obreiras e presidenta da xunta de persoal, María José Diéguez, entrevistouse esta mañá co rexedor socialista para explicarlle os motivos desta nova protesta cidadá.
Á saída da reunión, manifestou que «unha vez máis os motivos son ben coñecidos nesta cidade, a contratación de persoal, como está neste momento o servizo de Urxencias, a escaseza que temos para atender á poboación de Vigo, a contratación de médicos, as condicións nas que se atopan os traballadores do PAC de Vigo e unha infinidade máis de cousas que temos neste área sanitaria tan ampla e que tan poucos recursos temos».
O alcalde, Abel Caballero, manifestou que apoian a manifestación porque desde o goberno municipal constatan «as deficiencias da sanidade na cidade, algo tan evidente e tan obvio que xa ata o propio Feijoo recoñéceo». Listas de espera e dificultades sanitarias son para Caballero a confirmación do «fracaso da atención sanitaria na cidade»
«O feito de que teñamos que construír un segundo aparcadoiro para pólo gratuíto a disposición dos cidadáns de Vigo é unha mostra das deficiencias. Que alguén como enfermo ou visitante teña que pagar cantidades importantes nun sitio onde non hai alternativas é un copago á enfermidade. Por iso esta convocatoria ten o noso apoio» dixo o rexedor esta mañá nunha das súas habituais roldas de prensa na alcaldía.
