Alborada exhibe os froitos do curso de agricultura ecolóxica que celebra en Cotogrande

Arrinca Voz Natura, o programa de La Voz de Galicia, desenvolvido pola Fundación Santiago Rey Fernández-Latorre e que ten por obxectivo implicar á comunidade educativa a favor do medio ambiente e o coidado da contorna natural a través do desenvolvemento de diferentes proxectos. Pero non todos son de colexios. Tamén hai iniciativas de colectivos sociais que merece a pena coñecer, sobre todo se, ademais, pódese participar deles. É o caso de Verdear, programa que pertence á Asociación Cidadá de Loita Contra a Droga Alborada.

Alborada organiza, de outubro a xaneiro, un curso sobre agricultura ecolóxica aberto ao público e para dalo a coñecer puxeron en marcha unha exposición que se pode ver na súa sede en Vigo (Isaac Peral, 6). A entidade, que comezou o seu labor preventivo, asistencial e de incorporación social hai 36 anos, conta cun espazo destinado a fomentar a agricultura ecolóxica no medio urbano.

A modo de mostra do que fan no seu local expoñen unha pequena selección dos produtos que cultivan na leira de 5.000 metros cadrados cedida pola comunidade de Montes de Cabral en Cotogrande. Hai desde plantas aromáticas a maracuyá, pementos, verzas ou froitos do bosque.

Manuel Antonio Rodríguez Iglesias , coordinador do proxecto Voz Natura en Alborada, explica que «Verdear é un programa aberto. Naceu para formar en agricultura ecolóxica aos usuarios para que lles sirva no futuro para conseguir un emprego ou para integrarse nalgún proxecto de horto urbano que cada vez son máis frecuentes». Pero aclara que non son os únicos. Xa participaron outros colectivos que gozaron da experiencia.

O curso de iniciación agricultura ecolóxica comeza o 15 de outubro e desenvólvese ata finais de xaneiro os luns, mércores e venres de 09.00 a 13.00 horas. Apunta o coordinador que tamén organizan de febreiro a maio outro curso, de nivel avanzado, que dá acceso ao carné fitosanitario.

---

---

---