Caballero esixe máis investimento ao consorcio do Casco Vello tras a compra dunha casa
VIGO CIDADE
O alcalde di que hai 7 millóns en caixa e que só se van gastar 400.000 euros en adquirir edificios
14 sep 2018 . Actualizado ás 05:00 h.O comité executivo do Consorcio do Casco Vello, participado nun 90 % pola Xunta de Galicia e nun 10 % polo Concello, aprobou a compra doutra casa en ruínas na rúa San Francisco por 125.000 euros. O inmoble conta cunha superficie construída de 318 metros cadrados, dividido en catro plantas ( baixa e tres alturas), e fachada posterior á rúa Caramuxo. A edificación, do ano 1900, consérvase en moi mal estado a pesar de ser obxecto de diversas actuacións como a adición dunha terceira planta ao seu deseño orixinal ou a modificación do tamaño dos ocos da súa fachada para mellorar o acceso a un local comercial, sen actividade na actualidade.
Son xa 77 os inmobles adquiridos desde o nacemento do organismo. Agora están centrados en recuperar o Berbés onde se alzará a sede da Universidade, o albergue de Peregrinos que construirá Turismo de Galicia e rehabilitarase tamén un edificio en Berbés 41.
O consello de administración do consorcio aprobou anteriormente o seu plan de actuacións que suporá un desembolso de dous millóns de euros. Ademais dos gastos operativos o diñeiro empregarase a tarefas de rehabilitación dos inmobles situados en Abeleira Menéndez 16, Cruz Verde 8, Cruz Verde 12, Ferrería 8 e Praza do Berbés 41.
O alcalde, Abel Caballero, dixo que os investimentos reais do consorcio para o próximo ano son só de 400.000 euros e que o resto se empregará en soldos e gastos correntes. Caballero pide que o diñeiro para reformas some 2,5 millóns de euros o próximo ano e 5 millóns ao seguinte.
Caballero sostén que hai «sete millóns de euros en caixa e non se usan» e manifestou que fai falta maior rehabilitación no centro agora que se vai desbloquear o barrio do Cura e a Panificadora. O primeiro destes dous proxectos tardará polo menos un ano en empezarse
O delegado da Xunta, Ignacio López-Chaves, lembrou que o consorcio leva investidos no barrio histórico máis de 45 millóns de euros e reclamou ao goberno local que incremente a súa achega. «Maiores recursos permitiríanos maiores investimentos», dixo, á vez que pediu ao Concello que empezo a expropiar leiras conforme á nova ordenanza para seguir actuando ata o ano 2021.