Cae en Vigo unha banda colombiana de ladróns que se aloxaban en hoteis
VIGO CIDADE
A Policía Nacional seguíaos desde Madrid e os sete detidos xa están en prisión
31 ago 2018 . Actualizado ás 13:11 h.A Policía Nacional desarticulou unha banda itinerante de delincuentes colombianos que chegou este verán a Vigo para cometer roubos con forza en vivendas. Os sete arrestados atópanse xa en prisión preventiva por orde da Audiencia Nacional. Trátase de catro homes e tres mulleres con idades comprendidas entre os 22 e 41 anos.
Os ladróns aloxábanse en establecementos hostaleiros da cidade e quedaban para roubar despois de estudar os movementos das vítimas. Precisamente o rexistro do xefe nun hotel foi o que fixo saltar as alarmas.
Os axentes descubriron tratábase dun delincuente buscado en Madrid cando cruzaron os datos que de forma rutineira facilitan os hoteis ás forzas da orde. Impútanselles polo menos a comisión de tres roubos en Vigo e outro en Ponteareas e non se descarta que tamén sexan os autores dunha onda de roubos que sacudiu a cidade no principio do ano.
Tras varias xestións, púidose comprobar que o investigado, con múltiples roubos por toda a xeografía nacional, estaba acompañado doutras seis presentas e que se facían pasar por veraneantes de visita na cidade..
Os axentes intensificaron as vixilancias sobre o grupo e púidose constatar a súa actividade delituosa e a súa estrutura criminal, comprobando que alternaban as funcións de execución e vixilancia entre os seus sete compoñentes indistintamente.
Ausencias
Os arrestados actuaban durante o día, aproveitando a ausencia dos moradores nos inmobles e utilizaban dous vehículos para os seus desprazamentos.
Á hora de cometer os roubos violentaban a porta principal con palanquetas, picos de papagaio ou desaparafusadores de grandes dimensións. Tamén escalaban muros para entrar nas vivendas e mesmo rubían para entrar desde as terrazas.
Tras analizar todos os datos, os axentes estableceron o correspondente dispositivo e procederon ao arresto dos sete integrantes do grupo criminal. No rexistro dos dous vehículos interviñéronse varias xoias, máis de 3.000 euros en efectivo e diversas ferramentas utilizadas para violentar as portas, así como varios teléfonos móbiles, un computador persoal, uns prismáticos, luvas para non deixar pegadas e diversas pezas que utilizaban para ocultar o rostro. Os policías puideron demostrar que varios dos efectos recuperados proceden de polo menos tres roubos cometidos pola zona de Vigo.
A investigación correu a cargo de axentes da Policía Nacional de Madrid, onde cometeron varios delitos e contou coa colaboración da comisaría de Vigo, que como todos os anos por esas datas puxo en marcha un servizo especial de vixilancia para previr os roubos dentro de domicilios.