Espedrigada esixe ao Concello de Vigo a limpeza dunha parcela chea de maleza
22 jul 2018 . Actualizado ás 17:47 h.Os veciños da zona de Espedrigada, un barrio que a pesar de situarse entre Balaídos, Castrelos e Praza América aínda conserva o seu carácter rural, viven rodeados dun océano de maleza desde fai máis de sete anos. «Estamos aterrorizados, se prende isto sería un novo Chandebrito e se verían afectadas moitas familias. Estamos vivindo nun polvorín», alerta Manolo Guerra, presidente da asociación de veciños Val do Fragoso. Os residentes levan pedindo a limpeza desta parcela, duns 8.000 metros cadrados de superficie e dividida en tres propiedades, desde o 2013 cando presentaron a primeira demanda no Rexistro do Concello. Desde entón presentaron moitas máis queixas, «pero aínda non recibimos ningunha resposta oficial», lamentan.
A situación hase volto insoportable. Mátalas de silvas superan os catro metros de altura e nalgúns puntos comezan a devorar as copas das árbores destas leiras, ademais empezan a dar síntomas de estar secas. «Calquera chispa, ou unha colilla pode arrasar con todo. Un bombeiro xa nos dixo que se planta lume aquí, nos leva as casas por diante», teme Fernando, cuxa vivenda linda cunha das leiras abandonadas. «Eu vou limpando a zona que teño máis próxima, porque senón xa tiña as silvas amais », explica.
«Estamos falando dunhas matas de silvas de considerable altura e ademais hai un montón de casas rodeadas de esas matas», salienta o portavoz veciñal. Con todo, o risco de incendio non é o único problema que aflige á veciñanza. «A »,quí hai animais silvestres, gatos, ratas, e cobrasenumera Guerra. «E mosquitos, está cheo, unha vez entroume un enxame deles na casa», engade Fernando. «A nós éntrannos arañas, babosas e de todo pola fiestra», relata outra das afectadas. «Xa teñen aniñado as velutinas», alerta outro veciño.
«Queremos unha acción inmediata porque o Concello ten potestade para actuar sobre as fincas cargándolle os custes ao propietario da finca», esixen desde a asociación veciñal. «O que peor levamos é o silencio administrativo», admiten os residentes da zona, que apenas lembran a última vez que os operarios entraron a rozar a leira. «Temos aberto un expediente desde o 2013 e a última vez que cortaron isto debeu ser hai seis ou sete anos, cando se fixo a carretera», lembran os habitantes. «Aquela vez entrou un bulldozer enorme e limpou todo nunhas poucas horas», comentan.
A urxencia é tal, que algúns dos veciños mesmo se expuxeron iniciar eles a roza, pero temen que o firme non sexa estable ou que oculte algún perigo. «Nesta época as velutinas soen aniñar nos ocos do chan ou das árbores, se vai un traballador cunha desbrozadora e dalle ao niño, o acribillan», sinala Fernando.
Nunha das habituais visitas ao Concello para presentar máis queixas, os funcionarios recomendáronlle que deixasen de facelo porque o expediente xa se está tramitando e que non irá máis rápido por máis demandas que rexistren. «Os veciños non teñan que estar nesta ansiedade. Estamos no centro de Vigo e isto é inconcibible», conclúe Manolo Guerra.
A lei permite ás administracións limpar as leiras sen necesidade de autorización
Os incendios do 15 de outubro do 2017 permanecen aínda na memoria da sociedade viguesa. «Estaba todo isto cheo de fume, non respirábase», lembran os veciños de Espedrigada que ven na parcela que os rodea unha ameaza que podería facerlles revivir aquel inferno. Son conscientes de que teñen a lei da súa parte, polo que esixen ao goberno local que interveña de forma inmediata para limpar a leira.
Despois daquela xornada, a Xunta aprobou unha serie de modificacións á lei de acompañamento dos orzamentos para mellorar a prevención dos incendios. Estes cambios recollen que tanto a Administración autonómica como os concellos teñen a posibilidade de executar subsidiariamente a xestión de biomasa (limpeza de parcelas) sen necesidade de consentimento expreso do propietario e sen autorización xudicial. Tamén poderán realizarse limpezas subsidiarias inmediatas cando concorran razóns de risco.
Así mesmo, Xunta e concellos están capacitados para expropiar as parcelas de propietarios descoñecidos cando, ante incumprimentos reiterados de roza, os custos das accións de limpeza sexan superiores ao valor catastral do terreo.
A modificación da lei non se centrara soamente nas competencias da administración, tamén se endureceron as sancións para aqueles propietarios que eludan a súa responsabilidade no mantemento e limpeza das propiedades con multas que poden oscilar entre os 100 e os 1.000 euros.
No caso de Espedrigada, os veciños non entenden por que non se actuou xa, dado que, segundo eles, o Concello coñece a identidade dos propietarios e, con todo, fai máis de sete anos que as leiras non se rozan.