O cantautor padece larinxite e disfonía
22 jul 2018 . Actualizado ás 00:52 h.Serrat non puido co dobrete galego que tiña previsto para esta fin de semana. E mira que foi chulo o concerto da Coruña. A súa voz soou fresca e limpa, coma se non levase 47 anos virando polos escenarios do mundo. Pero nalgún momento, despois, crebouse de forma seria. O Concello de Vigo, organizador do concerto, comunicou a media tarde que o artista sufría unha larinxite que lle impedía cumprir o seu compromiso. O músico catalán é un profesional que nunca deixaría tirados aos preto de 20.000 espectadores que probablemente tería este sábado en Vigo no caso de que as cousas non se torceron tanto.
O concerto ía ser o segundo das Festas de Vigo sobre o escenario de Castrelos, o espectacular auditorio ao aire libre co que conta a cidade como ensina desde o século pasado, para as actividades lúdicas que o Concello organiza e pagamos entre todos para que as entradas non se saian de nai. Iso, se decides acudir á zona próxima ao escenario, xa que o acceso ao anfiteatro é totalmente gratuíto. Por iso, cando hai concerto en Castrelos, hai máis devotos (da festa) en procesión cara ao parque, que na do Cristo.
O de Joan Manuel Serrat en zona de pagamento custaba 6 euros e as entradas esgotáronse hai semanas. Duraron un par de días á venda. O que ofreceu no Coliseum da Coruña era máis caro, entre 40 e 70 euros, pero os que o viron gozaron de máis de dúas horas e nin sequera tiveron que rogarlle que cantase Mediterráneo. Fíxoo dúas veces sen que llo pedisen, recibiu unha longa ovación de dez minutos e estirouse con tres bises máis. Deuno todo. Non quedou nada de Serrat para Vigo.