As novas Citroën Berlingo, Peugeot Partner e Opel Combo ponse á venda este verán
15 feb 2018 . Actualizado ás 17:15 h.Ata hoxe só se coñecía ás novas furgonetas do consorcio francés PSA co código industrial K9. Pero agora xa sabemos todos os detalles duns modelos capitais para a marca e que para a fábrica de Balaídos en Vigo supoñen o seu alicerce máis importante: Desde 1.996 fabricáronse 4,5 millóns de Peugeot Partner e Citroën Berlingo na cidade olívica (outro millón hase derivado ás factorías de Mangualde -Portugal- e Pombal -Arxentina-).
Que cambia nesta terceira xeración? A novidade máis importante é que ás xemelgas Berlingo-Partner, saíulles outra irmá: a Opel Combo. Tras a compra da marca alemá por parte de PSA, terá un frontal característico e adaptado ao estilo doutros modelos da casa, como o Astra ou o Insignia. E é que estas furgonetas, beberán dos deseños típicos de cada marca. De feito a propia Berlingo, non pode negar o parecido familiar cos últimos lanzamentos de Citroën: o frontal é calcado ao do utilitario C3, que á súa vez xa se inspirou no primeiro C4 Cactus.
Os novos vehículos toman a plataforma EMP2 como base. PSA xa a usou en vehículos como o Peugeot 3008 ou o Opel Grandland X. Ambos de tipo SUV e estética campeira. Grazas a a nova plataforma, desde o grupo francés sinalan que se gaña en confort de marcha e pracer de condución. As furgonetas poderán ter ademais vantaxes de turismo e non de vehículo industrial: dirección asistida eléctrica, radio de xiro máis estreito e ata 19 axudas á condución: alerta de cambio involuntario de carril, sistema de vixilancia do ángulo morto ou cámara de visión traseira entre elas.
No que PSA denomina o concepto «Ludospace», nas súas versións para pasaxeiros, estes vehículos contarán con 186 litros en ocos portaobjetos. E segundo o acabado escollido, incluso un enorme teito solar panorámico. Nada que envexar ao mellor monovolume.
Ademais, por primeira vez, hai dúas tallas. A M confórmase con 4,4 metros de lonxitude. Pero agora aparece en escena a XL, de 4,75 metros. Máis espazo para carga (o maleteiro oscila entre os 775 e os 1.050 litros de capacidade), pero sobre todo, máis habitabilidade: haberá unha versión de 7 prazas.
As Berlingo-Partner-Combo chegarán aos concesionarios no verán. De momento na web oficial de Citroën anúncianse dous motores, con cinco potencias diferentes. En gasolina o 1.2 PureTech con 110 ou 130 cabalos. A versión diésel é para un 1.5 BlueHDI de 75, 90 ou 110 cabalos. A partir do ano que vén aumentará a oferta. A versión eléctrica non tardará en chegar.
PSA Vigo presenta a futura Berlingo
A terceira xeración do "superventas" de Citroën sairá ao mercado despois do verán
M.S.D. / S.A.
Desvelouse o misterio. PSA difundiu hoxe as primeiras imaxes da futura Citroën Berlingo, que Vigo fabrica en exclusiva para todo o mundo, e cuxo lanzamento está previsto para a segunda metade do 2018. Esta terceira xeración do vehículo comercial máis exitoso do grupo non chegará só. Estará acompañado das novas Peugeot Partner e Opel Combo con quen comparte plataforma de montaxe na factoría galega. Di PSA que o Berlingo III evoluciona en total coherencia cos últimos lanzamentos da marca. Gana en modernidade polo seu deseño e o seu confort, reforzando tanto o espírito fresco como o seu carácter práctico que permitiron o éxito deste icónico made in Spain, producido en Vigo, do que se venderon máis de 1,7 millóns de unidades.