Rescatan en Vigo a tres persoas de avanzada idade que vivían soas nas súas casas
VIGO CIDADE
No último incidente os bombeiros entraron por unha fiestra para auxiliar a unha veciña de 92 anos que pasou un día enteiro tirada no chan do seu cuarto
19 ene 2018 . Actualizado ás 05:00 h.«É un drama social, cada vez imos a máis, é o servizo que máis abunda. Teñen en común que son persoas maiores que viven soas e non se poden valer por si mesmas. Atopámolas tiradas no chan», di un bombeiro de Vigo.
A Policía Local e os bombeiros atopáronse en apenas 40 horas tres novos casos de desvalidos de 80 ou 90 anos que estaban encerrados nas súas casas. O último incidente foi onte pola tarde nun piso da rúa Quintela, en Coia. Os bombeiros entraron por unha fiestra para auxiliar a unha veciña de 92 anos que pasou un día enteiro tirada no chan do seu cuarto. A Policía Local e os bombeiros tamén se mobilizaron de madrugada para entrar pola fiestra e rescatar a dous veciños, un de 85 anos e outra de 83 que pedían auxilio ao verse atrapados nas súas respectivas vivendas. Nun caso, un usaba andador, caeu da cama e non podía moverse. Noutro, a muller dicía que alguén a encerrou na súa casa. Foi hospitalizada para a súa avaliación psicolóxica. En ambos os casos, os fillos acudiron a facerse cargo.
O primeiro incidente foi ás 6.36 horas do mércores na rúa Torrecedeira. Un veciño alertou ao 092 porque oíu berros dun home que pedía socorro no piso inferior. Como non abrían a porta, os Bombeiros usaron un coche escaleira para entrar por unha fiestra. Alí acharon a F.R.G., vigués de 85 anos, no chan sen poder moverse, desorientado e xunto a un andador.
A segunda intervención foi ás 4.42 horas de onte na avenida García Barbón onde unha señora de avanzada idade pedía auxilio. Trátase de M.D.R.M., viguesa de 83 anos. Os bombeiros usaron un camión escaleira e entraron no domicilio por unha fiestra.
O equipo de rescate viu á muller ben fisicamente pero déronse conta de que dicía frases e palabras incoherentes.
Pola tarde, os bombeiros de Balaídos rescataron á nonagenaria que levaba desde o mércores tirada en casa. Unha sobriña que a visitou alarmouse ao ver que ninguén respondía. A pasada semana contabilizáronse outros cinco rescates en apenas un par de días. Forenses e bombeiros alertan do drama social da soidade.