Tomiño despide a Rogelio Piñeiro Vázquez, un veciño moi querido que creceu en tempos de fame e que soubo progresar grazas ás súas inquietudes
20 abr 2021 . Actualizado ás 23:14 h.Tomiño perdeu a un veciño moi querido. Rogelio Piñeiro Vázquez faleceu o domingo aos 90 anos despois dunha vida moi frutífera. Aquel neno esperto que creceu nun ambiente de pobreza converteuse a base do seu esforzo e grandes inquietudes nun empresario feito a si mesmo que chegou a comprar o inmoble máis emblemático da súa parroquia natal, o castelo de Santa María de Tebra.
Foi un neno cunha mente privilexiada e un gran afán por aprender. Estudaba día e noite e axudou a moitos veciños do seu pobo a ler e a escribir. Frecuentaba a casa do seu mestre, Avelino Franco, que lle ensinou música, outra das súas grandes paixóns. Rogelio tocaba varios instrumentos e formou parte da Banda de Música de Tomiño. En casa do seu mestre, labrou unha gran amizade co seu fillo, Xosé Luis Franco Grande, o escritor, poeta, avogado e membro da Real Academia Galega que faleceu o 31 de marzo do ano pasado. A súa casa lindaba co castelo e os donos, os marqueses de Esteba das Delicias, tíñanlle moito cariño. Apadriñárono sobre todo na época na que tivo que incorporarse a filas. Estivo embarcado no buque Juan Sebastián Elcano.
Aos 19 anos fundou a empresa que leva o seu nome, dedicado ao sector da madeira. Foi un emprendedor pioneiro e innovador na comarca dentro desta industria. Introduciu os primeiros tractores e motosierras industriais de toda a zona. Tamén se involucrou na política local, chegando a exercer como tenente alcalde durante a transición, etapa na que deixou un gran recordo porque reunía moito consenso, axudou a moitos veciños e colaborou en múltiples iniciativas. Rogelio casou con Deolinda González e tivo cinco fillos, que continúan coa empresa Madeiras Rogelio Piñeiro.