Redondela segue adiante cun Entroido en tempos de covid

Redondela segue adiante co Entroido adaptándoo á situación sanitaria. Toca «reinventarlo», explica o bipartito, e renunciar aos tradicionais desfiles de comparsas, pasacalles e outras actividades que congregaban a milleiros de persoas, pero non á celebración de «unha das manifestacións culturais e tradicionais por excelencia da vila». O goberno local valerase das novas tecnoloxías «para manter viva a chama da festa». Tampouco faltará á cita este ano o Meco, que «será representado por unha figura de fantasía estreitamente ligada á tradición redondelana e que terá unha reivindicación clara: A necesidade de que todos unidos fagamos fronte ao covid e gañemos esa dura batalla da que aínda non se avista o final». «É unha mensaxe esperanzadora e unificador da vontade de toda a cidadanía», apunta o bipartito, polo que, do mesmo xeito que o Berete de Chapela, será salvado da queima, «para formar parte a memoria histórica do municipio».

O concurso de disfraces adáptase tamén á nova situación. Chegado o momento, os veciños poderán enviar as fotos e vídeos dos seus disfraces á dirección de correo electrónico facebook\redondela.gal, para ser publicados posteriormente nesta rede social. As que consigan máis Me Gusta, serán as que teñan dereito a premio. A concellaría de Comercio convoca á súa vez un concurso de escaparates para dinamizar a actividade do comercio de proximidade encher de colorido as rúas, a través dos escaparates dos establecementos. Haberá dous premios, á

Orixinalidade e á Tradición serán fallados por un xurado designado ao efecto. O establecemento gañador en cada unha das categorías terá como premio, unha cesta de produtos Gourmet que, como é xa habitual por parte do Concello, será adquirida en establecementos do municipio. O público decidirá o terceiro premio e, entre os participantes na votación, tamén se sorteará outra cesta de produtos Gourmet.

Trátase, sinala a alcaldesa Digna Rivas, «de que a pesar da situación sanitaria, de todas as trabas e inconvenientes que iso supón, Redondela manteña o espírito do seu Entroido e a través del, como fará o Meco, berrar que todos xuntos, poderemos vencer ao virus. Que unidos superamos situacións difíciles ao longo da nosa historia e unidos sairemos desta crise para, un día, lembrala só como un mal soño».

O programa darase a coñecer en próximas datas, explica, «ao estar aberto a modificacións segundo evolucione a crise sanitaria e dependendo das recomendacións, tanto autonómicas como estatais, para esas datas»

---

---

---