Os comuneiros do Porriño, Ponteareas e Salceda urxen axuda para frear o impacto de pilotos que converten as pistas forestais en circuítos de carreiras
23 ene 2021 . Actualizado ás 23:00 h.A freada da actividade humana durante a primeira onda da pandemia, paradoxalmente, beneficiou ao medio ambiente. Con todo, a segunda e a terceira ondas están a impactar forte na contorna rural. E fano a bordo de vehículos de motor e prácticas de xulgado. Sete comunidades de montes do Porriño, Ponteareas e Salceda fan un chamamento conxunto para intentar acabar cos «estragos no patrimonio natural e forestal» e os «enormes danos» que, explican, están a ser cometidos por motos, quads e todo terreos.
Denuncian a presenza masiva deste tipo de vehículos nos montes comunais. «É un problema que xa preocupaba con anterioridade, pero desde a entrada en vigor do estado de alarma, e, especialmente, nos últimos meses, o aumento de vehículos no monte é exponencial», advirten os comuneiros.
Fan pública unha situación insostible. Explican que os peches perimetrais e a prohibición de desprazarse a Portugal provocaron que os pilotos vaian aos montes da Louriña e O Condado para practicar a súa afección. «O problema é que moitos circulan coma se tratásese dun circuíto de competición, sen ningún tipo de coidado nin respecto pola contorna. As pegadas que deixan no monte visibilizan que o practican non é deporte ao aire libre senón puro vandalismo», manifestan os responsables dos espazos forestais.
A situación repítese a diario pero a afluencia dispárase a partir do venres. «Todos os días, pero de xeito alarmante nas fins de semana, sen pedir permiso nin autorización, transitan a toda velocidade por pistas forestais, monte a través, instalacións das áreas recreativas, lugares de interese etnográfico e plantacións forestais. Non respectan nada, todo lles parece tramo libre», denuncian. Teñen unha nutrida galería de imaxes captadas polos veciños que ilustran o impacto. «Demostran a falta de sensibilidade dos pilotos co espazo natural. Non parece importarlles que os graven, nin tan sequera, como se reflicte nalgún dos vídeos, que se lles advirtan das posibles sancións ás que se enfrontan», indican.
Os comuneiros lembran que a normativa respecto diso é moi clara. «A lei de montes de Galicia dispón que as pistas quedan adscritas á xestión forestal e que, en ningún, caso terán consideración de acceso rodado público. Está prohibida a circulación motorizada campo a través, por carreiros ou devasas, excepto para vehículos vinculados á xestión agroforestal, á cinexética ou á prevención de incendios», repasan de corrida. Lembran que, ademais, os montes comunais non son públicos. Ao longo destes meses, topáronse con motos e quads sen matrícula, sen seguro e condutores sen carné. Pero a situación non para, a pesar de que eles xa tramitaron varias denuncias e, que tanto axentes forestais, como gardas do Seprona actuaron e imposto tamén varias multas.
Fan por iso unha fronte común. «Demandamos das autoridades, especialmente da consellería de Medio Rural, pero tamén das forzas e corpos de seguridade, unha maior implicación na resolución do problema. Ofrecemos toda a nosa colaboración, pero non temos capacidade sancionadora», din. Con imaxes de pistas esnaquizadas, pedras partidas, e camiños arrasados, insisten en que «é imprescindible a sensibilización da cidadanía e a axuda dos organismos oficiais».