O proxecto sitúase no barrio de Outeiro
30 jun 2021 . Actualizado ás 18:25 h.A comunidade de montes da parroquia de montes de Torroso construirá un centro social para os seus maiores. Este gran proxecto, que dará cabida a 40 usuarios, está situado no barrio de Outeiro, ao carón do centro dotacional, edificio que alberga tamén o conservatorio de música do municipio de Mos.
A nova obra consiste na construción de «un edificio diáfano, pechado cara á parte que dá á estrada, pero aberto e acristalado cara ao parque forestal Poulo-Regueiro e cara á parcela da comunidade de montes». O proxecto inclúe a urbanización deste espazo, para que se integre no conxunto planificado para uso e goce dos maiores da parroquia. O novo centro social desenvolverase nunha planta, así o edificio integrarase naturalmente no parque, podendo utilizar os maiores estes espazos abertos como complementarios no uso habitual das instalacións.
O pleno de Mos aprobou o luns a bonificación do imposto de construcións (ICIO) do proxecto. Trátase do 95 % do total, o que representa uns 20.098 euros, ao tratarse como unha obra declarada de especial interese municipal por concorrer circunstancias sociais. A aprobación foi posible cos votos favorables do goberno local e dos concelleiros non adscritos Verónica Costas e Román García. Os edís do PSOE, Gañamos e BNG abstivéronse. O pleno aprobou tamén unha bonificación de 83.659 euros a favor de Cogami, que representa o 95 % do total do imposto que deberían asumir para o seu proxecto de reciclaxe, Coregal. Trátase da implantación dunha nova planta de xestión de residuos non perigosos (almacenamento, tratamento e valorización) no parque empresarial da Veigadaña, na que dará e manterá o emprego de persoas con diversidade funcional. Do mesmo xeito que a obra de Torroso, esta é tamén unha obra de interese social e de fomento do emprego, que dará oportunidades laborais a futuras xeracións.