Nos últimos días disparouse a demanda dos bares
11 may 2021 . Actualizado ás 05:00 h.Desde que se aprobou a normativa que obriga aos restaurantes a colocar nos seus establecementos medidores de CO2, a empresa Rodavigo, situada en Mos, xa vendeu máis de 400 aparellos. Os establecementos non se arriscan a recibir unha multa e menos aínda cos prezos económicos que teñen os medidores. De feito, os máis vendidos foron os que oscilan entre 70 e 80 euros.
«Só nesta mañá tivemos sete ou oito pedidos, case todos foron adquiridos para a hostalería, é unha pena que non leven para outros locais porque permiten controlar a situación. Eu teño amizade cun club deportivo e regaleilles un», comenta o xerente da empresa, Nazario Correa.
Cre que ao non ser obrigatorio para todos os locais non se colocan, sen darse conta da confianza e seguridade que dá á clientela.
«Se o medidor está por baixo de 750 é que a calidade do aire está ben», indica o responsable de Rodavigo. É outra das vantaxes, que calquera pode comprobar a situación no interior dun establecemento, xa que a maioría dos medidores están situados á vista.
A pesar da gran demanda, non ten lista de espera porque xa contaba con iso. «Isto non é como as máscaras, cun chega, non hai que estar a repor», engade Nazario Correa.