O frigorífico de Irmáns Fernández Ibáñez na Veigadaña, de 12.000 metros cadrados, xogou un papel destacado na urxencia sanitaria
17 abr 2021 . Actualizado ás 05:00 h.A industria conserveira e os supermercados puideron manterse abertos e alimentar á poboación no máis duro confinamento grazas a un labor oculto de grandes empresas. Unha delas é Irmáns Fernández Ibáñez, consignatarios de pesca e conxeladores. A conselleira do Mar, Rosa Quintana, que visitou onte o seu novo frigorífico de 12.000 metros cadrados en Mos (construído no 2019), destacou a importancia de contar cunha instalacións innovadoras e enxalzou o papel que desempeñou esta planta de frío e elaboración de produtos de mar durante varios meses da pandemia.
Grazas a esta infraestrutura e aos seus 30 empregados, a flota de palangre de superficie puido almacenar as súas capturas en plena urxencia sanitaria. Hai un ano, ante as dificultades de comercialización, a empresa ampliou a capacidade de frío da que dispuña xa que ata entón só tiña 8.000 metros cadrados no porto de Vigo, onde naceu a firma hai 70 anos.
A nova infraestrutura no polígono da Veigadaña conta con cámaras que permiten manter o produto ultracongelado, en particular atún procedente do océano Índico, a 50 graos baixo cero con todas as súas propiedades organolépticas desde a súa recepción ata a súa distribución. Esta planta, deseñada con características de eficiencia enerxética, dedícase á preparación, clasificación e almacenamento de peixe para a súa elaboración e venda en grandes superficies. É a primeira deste tipo en Galicia e a máis innovadora de España.
A conselleira do Mar lembrou que, para a construción da nave, Irmáns Fernández Ibáñez recibiu unha axuda da Xunta de máis de 5,3 millóns de euros na convocatoria de achegas do 2019 para a pemes de transformación de produtos do mar. Este ano, o Executivo galego destina a estes apoios un total de 16 millóns cofinanciados co Fondo Europeo Marítimo e de Pesca.
Subvencións do 50 %
O Goberno autonómico subvenciona ata o 50 % dos investimentos que fagan as pemes en aforrar enerxía ou reducir o impacto no medio ambiente. Tamén as que melloren a seguridade, hixiene, saúde e as condicións de traballo. Igualmente apoian a transformación de capturas de peixe comercial que non se poidan destinar ao consumo humano. Así mesmo, poden percibir axudas a transformación de produtos de acuicultura ecolóxica e os novos procesos e sistemas de xestión e organización.
Rosa Quintana destacou a importancia de brindar apoios ao sector para dotar a actividade de instalacións que faciliten o seu labor. Máis aínda, se cabe, nun contexto marcado polas dificultades derivadas da covid-19 no que o sector marítimo-pesqueiro foi declarado esencial e non pechou no confinamento. Na convocatoria do ano pasado beneficiáronse destas achegas 40 proxectos por un importe de preto de 15 millóns de euros: Desde 2016 concedéronse a apoios a 230 iniciativas de transformación de produtos do mar por valor de máis de 57 millóns de euros.