A victima, de 55 anos, foi localizada semidesnuda na vía pública, preto da súa casa
31 oct 2019 . Actualizado ás 22:20 h.A Garda Civil investiga o falecemento dun home, de 55 anos de idade, cuxo cadáver apareceu na mañá deste xoves no municipio pontevedrés de Mos. O macabro achado produciuse sobre as dez nun camiño. O corpo sen vida deste veciño da zona das Regadas localizouse na rúa que hai xusto fronte á súa casa, no camiño da Tomada, da parroquia de Louredo. Trátase dunha vivenda unifamiliar que está situada a escasos cincuenta metros da estrada Nacional 550.
O equipo de Policía Xudicial da Comandancia de Pontevedra asumiu a investigación do caso e traballou no lugar durante horas para analizar o escenario e poder así trazar unha hipótese. Polo monento ningunha posibilidade está descartada e tampouco transcendeu ningún dato da autopsia.
A vítima, J.L.F.F., de 55 anos e natural de Lugo aínda que veciño de Mos, apareceu en roupa interior e con numerosos golpes e arañazos en diversas partes do corpo. A Garda Civil investiga o caso como un homicidio, sen que de momento se poida determinar a causa do falecemento nin o móbil, aínda que non se descarta que teña sido un posible roubo, unha pelexa ou mesmo un axuste de contas. O certo é que a veciñanza se sobrecogió cos feitos, xa que se trata dun lugar moi tranquilo no que non se rexistran incidentes e no que a vítima era coñecida, xa que levaba bastante tempo residindo na zona.
O corpo da vítima estaba ao lado dun vehículo e tendido no chan. O levantamento do cadáver realizouse pouco despois das doce e media do mediodía e ordenouse o seu traslado ao hospital Nicolás Pena de Vigo para que lle fose practicada a autopsia.
Autopsia
Aínda que ao principio se valorou a posibilidade de que o corpo presentase algunha ferida por arma de fogo, xa sobre o terreo e, tras a inspección ocular, descartouse este extremo, abríndose así o abano sobre as posibles causas do falecemento que impactou a todo o municipio de Mos. Gardas do Equipo de Policía Xudicial peitearon a contorna en busca de pistas sobre a autoría e as circunstancias dos feitos. Haberá que determinar tamén se o falecemento se produciu na vía pública, onde se localizou o corpo sen vida da vítima ou se foi trasladado desde algún outro lugar ata alí para que fose localizado. Os gardas realizaron unha exhaustiva inspección do lugar para determinar se algún outro vehículo pasara recentemente pola zona ou se había algún outro elemento que poida guindar luz sobre este luctuoso suceso.