O BNG obtén por sorpresa a alcaldía de Mondariz tras obter o respaldo dos edís do PP

En Mondariz produciuse a única sorpresa nas eleccións de alcaldes desenvolvidas onte no sur da provincia de Pontevedra. O BNG gobernará este municipio grazas aos votos a favor proporcionados por dous membros do PP.

Nin o propio candidato nacionalista, Xosé Emilio Barrios, agardaba ser alcalde onte. O seu partido presentábase á sesión con tres concelleiros, un menos que Alternativa por Mondariz, a forza máis votada nas eleccións do 26 de maio. Con todo, a súa cara transformouse en incredulidade e despois en alegría cando viu como era apoiada a súa candidatura polos votos favorables dos dous concelleiros do PP e do único representantes do PSdeG-PSOE.

Nos días previos á votación, os nacionalistas descartaran chegar a un acordo coa forza máis votada no municipio porque, segundo sinalaban, que non tiñan garantías para poder realizar un traballo conxunto. Xosé Emilio Barrios si afirmou que poderían chegar a acordos puntuais.

Agora, Barrios substitúe á fronte do municipio a Xoán Carlos Montes Bugarín, Calis, que era o candidato de Alternativa por Mondariz. Este político mondarizano levaba catro anos como alcalde e outros oito como concelleiro, catro deles como membro do BNG.

Os catro concelleiros nacionalistas enfróntanse agora a catro anos de gran inestabilidade no goberno debido a que terán que buscar apoios puntuais co resto das formacións políticas do municipio.

A corporación municipal de Mondariz está conformada por catro concelleiros de Alternativa, tres do BNG, dous do PP, un do PSdeG-PSOE e un de Cidadáns.

---

---

---