Acadou o título en categoría cadete e está considerada unha das grande promesas da disciplina en Galicia
04 dic 2018 . Actualizado ás 05:00 h.A taekuondista do Club Patiño Cloe Iglesias (Moaña, 2004) proclamouse esta fin de semana campioa de Europa cadete tras vencer os cinco combates disputados e indo de máis a menos durante a súa participación. É o primeiro gran éxito internacional dunha moza deportista que, segundo conta o seu adestrador, Miguel Patiño, explotou no último ano e medio, revelándose como unha das grandes promesas galegas da disciplina.
A medalla non foi ningunha sorpresa tendo en conta a traxectoria que trazou a moza nos últimos meses. «Viña dunha gran tempada, facendo podios en todas as competicións e invicta a nivel galego», lembra o técnico. E aínda que estaba por ver como respondía nunha competición destas características, as expectativas eran altas. «Poden aparecer os nervios, e de feito nela notáronse ao principio, pero a medida que avanzaba ía dando un salto e atopábase cada vez mellor. Sabiamos que podía conseguilo, pero tiña que demostralo», di o preparador. Para el era clave que a moza «non sentise ningún tipo de presión nin obrigación de gañar», como así sucedeu.
«Creo que algúns compañeiros si apostaban que ía conseguir unha medalla, pero eu non pensaba moito en iso», di a campioa, que recoñece que se sentiu «un pouco nerviosa ao principio» do torneo disputado en Marina D'Or (Castelló). Verse coa medalla ao pescozo supúxolle «moita alegría» e admite que lle custaba crerse o que acababa de conseguir.
Cloe iniciouse no taekuondo aos catro anos animada polos seus pais. «A min a técnica non me gustaba nada, odiábaa. Empecei a gozar cando probei o combate», relata a moañesa. Confírmao o seu adestrador, que revela mesmo que cando acudía a clases das dúas disciplinas non era raro que se saltase algunha que outra das que aborrecía. «Non llo tomaba moi en serio e cando empezou a facelo e ademais o físico acompañáballe, foi cando empezou a destacar», lembra Miguel Patiño.
Non pasou máis que «un ano ou ano e medio» desde que o adestrador foi plenamente consciente do potencial que tiña a nova. «Ao desenvolverse fisicamente quedóuselle unha fisionomía perfecta para este deporte. Ademais empezou a adestrar todos os días e foi aí onde cambiaron as cousas», explica.
A súa primeira incursión internacional, hai uns meses, non foi do todo satisfactoria. «Angustiouse e pasouno mal, pero fixémoslle ver que era normal e saíu fortalecida», indica o preparador. A principal cualidade que ve nela é, á parte do seu físico, a súa capacidade para ser flexible á hora de probar cousas novas e adaptarse a modificacións tácticas. «É moi receptiva e moi acougada, ten unhas cualidades impresionantes e á vez moita marxe de mellora», debulla. O seguinte paso será a etapa júnior, que comeza no 2019 e no que Patiño está convencido de que Cloe seguiralles dando moitas alegrías.