A actuación dos axentes o venres pola tarde permitiu trasladar ao mozo ao hospital
14 oct 2017 . Actualizado ás 18:05 h.Axentes da patrulla do Destacamento de Tráfico da Garda Civil salvaron a vida a un mozo de 27 anos que se atopaba inconsciente e sen pulso nunha vivenda ao proceder a reanimalo antes da chegada do persoal sanitario do 061.
Segundo informou o instituto armado, os feitos sucederon sobre as 18,00 horas do venres 13 de outubro nunha vivenda situada no lugar de Quintela, en Moaña.
Unha patrulla do Destacamento de Tráfico, ao circular polo quilómetro 15,800 da estrada PO-313 ao seu paso por Moaña, observou a unha muller que requiría urxentemente á patrulla porque o seu curmán se atopaba inconsciente nun domicilio de Quintela.
Presentados urxentemente no interior da vivenda, os axentes observaron a un home en mozo en roupa interior tombado no chan boca arriba, de 27 anos, que non tiña pulso nin respiración, polo que inmediatamente procederon a realizarlle a técnica de resucitación consistente en masaxe cardíaca e respiración boca a boca.
Así permaneceron os axentes ata a chegada dos servizos médicos, aproximadamente dez minutos despois, os cales lograron sacalo da parada cardiorrespiratoria uns 20 minutos máis tarde.
Persoal de 061 solicitou escolta ata o Hospital Álvaro Cunqueiro (HAC) de Vigo, dada a gravidade da persoa, polo que os axentes realizaron ese acompañamento.
Posteriormente, indican as mesmas fontes da Benemérita, o 061 púxose en contacto coa central COTA da Comandancia para entrevistarse cos axentes actuantes, aos que dixo que esta persoa ingresou con vida na UCI e felicitou e agradeceu a actuación.
Segundo as dúas doutoras que fixeron a reanimación, «esta non fose posible sen a exitosa primeira atención prestada pola patrulla do Destacamento de Tráfico no lugar que, segundo o persoal médico, salvou a vida do novo», subliña a Benemérita.