Hoxe ábrese o prazo de inscrición para participar nunha ruta o próximo 29 de setembro
02 sep 2019 . Actualizado ás 05:05 h.A Deputación de Pontevedra abre hoxe o prazo de inscrición para que as persoas interesadas poidan apuntarse á Depoandaina por Cangas e as illas Cíes, a quinta das rutas programadas este ano pola institución provincial para fomentar hábitos de vida saudable e promover o turismo. Esta actividade desenvolverase o vindeiro domingo 29 de setembro.
Como en todas as Depoandainas, a Deputación ofrece 300 prazas para participar neste itinerario, que se desenvolverá pola mañá e pola tarde do mencionado domingo. Así, na ruta da mañá, as persoas participantes percorrerán o coñecido bosque encantado de Aldán e poderán contemplar as vistas da Costa dá Vea, un dos mellores enclaves naturais das Rías Baixas situado no Concello de Cangas.
Unha vez finalizada esta primeira camiñada, os participantes desprazaranse desde o porto de Cangas ás illas Cíes, onde gozarán dun almorzo e realizarán, posteriormente, a espectacular ruta do monte Faro. En total, a Depoandaina suma 10,5 quilómetros (3 en Aldán e 7,5 en Cíes) e ten unha dificultade media.
A camiñada está aberta a persoas de toda a provincia e de todas as idades, e para facilitar a súa participación, a Deputación habilitará autobuses que sairán desde a praza de Galicia, de Pontevedra, e da praza de España, de Vigo. A inscrición neste itinerario por Cangas e Cíes está aberto ata o próximo 18 de setembro. As persoas que estean interesadas en participar deberán cumprimentar o impreso de solicitude na páxina web www.depo.gal. Ademais das 300 prazas previstas, o Concello de Cangas poderá ofertar outras cincuenta prazas adicionais.
As Depoandainas volverán despois xa no mes de outubro. Nese mes terán lugar as dúas últimas rutas das sete programadas. O día 6 será polo monte de Santa Trega no Concello da Guarda e os muíños do Folón no Concello do Rosal (a inscrición abrirá para ese caso o 23 de setembro) e o día 12 pola ruta da Pedra e dá auga de Ribadumia (abre o prazo o 30 de setembro).