Balonmán Os do Morrazo superan ao Sinfín nunha cita crucial para a salvación
23 mares 2019 . Actualizado ás 05:08 h.O Balonmán Cangas deu un paso de xigante na súa loita pola permanencia na liga Asobal, despois de vencer pola mínima ao Sinfín cántabro (27-26), nun partido que se decidiu nos últimos minutos, cando se entoou en defensa e superou o seu «desfalecemento» ofensivo. A vitoria permítelle coller catro puntos de marxe sobre a zona de descenso que marca o Teucro a falta de sete xornadas para o final da tempada.
Cun calendario terrorífico no tramo final do curso, ao conxunto cangués íalle a vida neste choque, e iso notouse no inicio. Cun espectacular Xavi Díaz na portería e unha notable efectividade no ataque posicional, o equipo cangués non tardou en ensinarlle os seus dentes ao Sinfín, obrigando ao técnico visitante, Rodrigo Reñones, a pedir tempo morto (6-1, min.8).
Un parón que reactivou ao conxunto cántabro, que, apoiando na súa solidez defensiva, non tardou en apertar o electrónico. Magí Serra reaccionou con outro parón (9-7, min.16). O marcador moveuse a tiróns, ata que, coincidindo cunha rotación masiva nos locais, o Sinfín tomou o mando do choque tras un parcial 1-6 en dez minutos (14-15, min.33).
Soubo sufrir o Cangas e de novo colleu unha renda de dous goles (19-17) coa que soubo xogar, non sen sufrimento, ata os últimos minutos, onde atopou no extremo a Adrián Menduíña a solución aos seus problemas no ataque posicional para asegurase un triunfo vital na súa carreira pola permanencia.
O equipo de Magi Serra pechará agora o mes de marzo en Guadalaxara ante un rival que ten a permanencia atada e que xa fixo os deberes esta tempada.
?Xavi Díaz, Menduiña (5,3p), Vujovic (2), Cerqueira (1), Gavidia, Cancio (2) e Muratovic (5); Simes (2p), Mitic (1), Suso Soliño (1p) Chapela (4), Rubén Soliño (1), David Iglesias (2) e Ángel Rodríguez (1).
?
Ibáñez, Iglesias (6), Silva (4), Torriko (2), Lon (2), Vales (4,1p) e Postigo (1); Salvarrey (ps), Dimitrievski (1p), Alberto Pla (5), Héctor Soa Lastra (1) e Muñiz.
Marcada cada cinco minutos: 3-1, 7-3, 9-5, 11-8, 13-10, 13-12 (descanso); 16-16, 19-17, 20-19, 22-21, 24-23 e 27-26 (final).
Incidencias: O Gatañal ante uns 2.200 espectadores.