A ausencia de vento en augas de Baiona impediu saír onte aos ORC
04 sep 2017 . Actualizado ás 17:19 h.Na última xornada do 32 Trofeo Príncipe de Asturias, celebrada en augas de Baiona, a ausencia de vento impediu realizar as probas previstas aos barcos das categorías ORC1, 2 e 3, polo que as clasificacións quedaron tal e como estaban establecidas desde o sábado, co Pairo 8, patroneado por Jordi Xammar, como gañador en ORC1, ao ter gañado a segunda das dúas regatas celebradas, desfacendo así o empate no que estaba co Xekmatt e o Aceites Abril. Na Clase ORC2 a vitoria foi para o Sum Innovation patroneado por Willy Alonso. O Rodman 42 do Náutico de Sanxenxo impúxose ante os portugueses Porto de Aveiro e MBA Atlántico. O Sum pode gañar a próxima semana o Trofeo Presidente da Xunta tras as súas dúas vitorias na Coruña e Baiona.
En ORC3 a vitoria foi inapelable para o Maracaná I de Luis Suárez, por diante do Unus de Luis García Trigo, mentres en ORC 4 e Open os triunfos repartíronllos o Con Caalma de Javi Rey e o Jandrocho Team de Roberto Reboredo, respectivamente, que onte puideron completar unha nova proba costeira.
Entre os J80, Javier da Gándara, patrón do Okofén, acabou noveno na única proba disputada onte con triunfo para o Lúa Nova de Tuero, O Okofen, con todo, levantouse ao primeiro posto da xeral desfacendo un empate co Miudo.
Os 6M tampouco puideron navegar onte, co que a clasificación quedou encabezada polo Maybe de Luis Martín Cabiedes, por diante do Bribón Movistar do rei emérito Juan Carlos de Borbón, mentres na Ola Ladies o triunfo levoullo Marta Ramada, seguida por Rosalía Martínez.