Sánchez suspende a súa axenda para reflexionar se renuncia á Presidencia tras a denuncia contra a súa esposa
O presidente e o principal patrocinador deixarán o Guardés a final de curso
20 ago 2019 . Actualizado ás 05:00 h.Tras 11 anos presidindo o Atlético Guardés, José Manuel Silva e a principal empresa patrocinadora deixarán de estar vinculados ao club guardés. A causa desta saída son as discrepancias que mantén a directiva coas institucións públicas, tanto co Concello da Guarda como coa Deputación de Pontevedra, pola cantidade de diñeiro público que reciben, o cal é inferior ao estimado polos dirixentes da entidade para a súa viabilidade económica. O presidente lembra que xa leva un ano anunciando esta decisión por «falta de colaboración», pero alzou a voz no acto de presentación do equipo para reiterar a súa inamovible postura de desacordo, ademais de confirmar que esta é a súa última campaña ao mando do equipo feminino.
diñeiro público
Queixas polo apoio económico recibido
Desde o club non entenden a cifra que percibe o conxunto por parte das administracións públicas. O Atlético Guardés recibe 38.000 euros, unha cifra menor á que creen que se merece e necesita un club que leva sete anos consecutivos xogando competicións europeas. «O que máis lle molesta aos políticos locais é que lles digamos que a 35 quilómetros de nós hai un equipo que compite na mesma categoría e o seu concello dálle unha subvención de 130.000 euros, mentres que nós recibimos 38.000 euros», explica o máximo dirixente.
O Balonmán Porriño obtén case 100.000 euros máis das arcas públicas que o equipo da Guarda, polo que as queixas da directiva van encamiñadas ao custo de persoal dos políticos da localidade: 30.000 euros máis que os do Porriño. «Escúdanse en que esa poboación ten máis industria e xente que A Guarda. Entón pregúntome, por que o custo dos nosos políticos locais é 30.000 euros maior? Como se entende isto?», cuestiona o presidente.
Viabilidade do club
A directiva lembra que a colaboración é a clave
A pesar das reunións que mantiveron co alcalde e a concelleira de deportes, os 38.000 euros destinados ao equipo feminino de balonmán non se modificarán. «Isto é un tema de diñeiro, non político. Unha empresa non pode soportar todo o peso económico dun club, ou nos axudan todos ou é imposible», afirma.
A directiva destaca que a colaboración das institucións públicas é a clave para a viabilidade económica da entidade guardesa. Silva apunta que a cifra que o Guardés necesita para ser viable e san en termos monetarios debe ser similar á que percibe o conxunto porriñés, é dicir, un total de 130.000 euros, unha cantidade bastante afastada da actual. «A cifra que este club necesita ten que ser como mínimo a do Balonmán Porriño», explica e mantén o seu enfado coas decisións que toma o Concello.
Postura inamovible
A decisión de abandonar é definitiva
A situación parece irreversible, polo menos esa é a posición que adoptou a cúpula do Guardés. Ademais, Silva escapa das críticas que lle acusan de facer política con este tema: «Os políticos din que fago política e eu non quero facela, o único que digo é que o Atlético Guardés só é viable con axuda das institucións». As discrepancias co concello son evidentes e a situación chegou a un punto no que Silva afirma que «ningún político nos vai a tomar máis o pelo».
A postura é inamovible e advirten que «as institucións se teñen que mover para que isto cambie». Por iso, o Atlético Guardés afronta o seu último ano coa actual directiva e agárdase un futuro cheo de incógnitas.