Xogadoras e pais non compartían a decisión da directiva de cesar ao técnico
29 nov 2025 . Actualizado á 05:00 h.O equipo cadete que abandonou o Sárdoma a semana pasada despois de que se prescindise do seu adestrador comezou onte a adestrar na ETEA co mesmo corpo técnico. Piden ao club que lles dea a baixa -a un total de 17 futbolistas- e prevén enviar un burofax a tal fin.
O conflito entre as partes comezou a semana pasada, cando se comunicou ao adestrador, Juan Corrales, que cesaba nas súas funcións, algo co que non estaban de acordo as xogadoras. Elas e as súas familias argumentan que estaban contentas co técnico e que, ademais, os resultados no deportivo acompañaban, de modo que non vían motivo para un cambio no banco. Ademais, cren que se produce xusto despois da sexta xornada, o límite para que as deportistas non poidan xogar con outro club.
O desencontro entre a directiva que encabeza Begoña Aldao e o adestrador radica en que este non estaba de acordo coa política do club de subir ás súas xogadoras a equipos de categoría superior, algo que atribúe á gran desbandada de xogadoras que sufrieon os dous equipos sénior da entidade o curso pasado. Agora, perden 17 máis e o equipo xa non se presentou a xogar o compromiso da pasada fin de semana; gañaran os seis disputados ata o de agora.