Iago González, xuvenil de segundo ano e fillo do exfutbolista profesional redondelano, debutou en Preferente co Choco
27 nov 2025 . Actualizado á 05:00 h.A pasada fin de semana, o adestrador do Choco, Alberto Rabadán, fixo debutar en Preferente a un xuvenil de segundo ano que tivo unha estrea redonda: gol, asistencia e moi boas sensacións. Os seus apelidos non o delatan, pero Iago González Filgueira é o fillo maior de Pablo (González) Couñago, a quen colleu por sorpresa esta primeira incursión co equipo sénior para o seu primoxénito. Marcou o 3-2 e deu a asistencia do 4-2 nun duelo que comezaron 0-2 ante o Tyde.
«Non esperaba que tivese esta oportunidade xa e, ademais, estivo moi ben. Estou moi contento por el», comenta Couñago. Destaca que Iago é «un rapaz súper traballador, que leva moitos anos esforzándose, tomando o fútbol coma o hobby que é, pero tamén coa ilusión de chegar o máis arriba que poida». Naceu en Ipswich cando el xogaba alí e en de neno, custáballe. «Ao estar tanto tempo fóra, e cambiando e país, non xogou desde tan pequeno. E logo ía algo atrasado respecto a outros nenos que empezaran antes», analiza.
Pero tivo unha grande evolución que se notou especialmente nos dous últimos anos. «Grazas ao crecemento e ao seu traballo, porque lle encanta adestrar e o ximnasio, deu un cambio moi grande fisicamente», constata. Sempre sobresaíu pola súa disciplina e o seu interese por mellorar, á parte dos consellos da súa nai, nutricionista, que lle serviron de moito.
Couñago, pola súa banda, non era partidario de darlle consellos, como tampouco ao seu fillo pequeno, ata que eles o foron requirindo. «A nai botábame a bronca con agarimo porque era como: ‘Teñen un pai que foi futbolista e non lles dis nada de fútbol’». Pero o seu enfoque era outro. «Con oito ou dez anos, teñen que divertirse e non tes que dicirlles nada. Vino con outros nenos aos que os pais lles dicían isto, lles berraban o outro e os fillos se queixaban; non levaba a nada», reflexiona. Tiña a convicción de que se os rapaces querían saber algo, preguntarían chegado o momento, e así foi. «Ese momento chegou e cando preguntan, aquí estou, sen ser ese pai pesado que está amais».
Tampouco lle gusta ser demasiado crítico nin o contrario despois dos partidos. «Penso que cando o fai mal, sábeo, e cando o fai ben, o mesmo. Sempre hai outro partido para a semana», analiza. Iso non quita para que estea «encantado de dar opinión cando a piden» e que sinta como unha recompensa cando iso pasa á súa elección de deixar que crecesen ao seu aire no ámbito deportivo.
No Choco desde que a familia se volveu a establecer en Galicia, Iago nunca quixo cambiar de club aínda que llo propuxeron. «Nunca miramos a necesidade de saír das comodidades que che dá estar no equipo do pobo, e menos sendo infantil ou cadete. Se agora viñese o Celta, por exemplo, xa sería outro salto e outra idade», expón. E non oculta que lle faría ilusión ver a Iago de celeste algún día. «Se se presentase o Celta, non habería máis que falar e sería moi bonito. Pero el agora non está pensando niso, senón en seguir medrando no Choco».
Couñago recalca que o feito de que Iago debutase en Preferente non significa que sexa xa xogador desa categoría, pero si considera que o potencial está. «Coa evolución que leva e a ambición que ten, non sei a onde pode chegar, pero penso que para Preferente ou Terceira pode estar capacitado. Os dous últimos anos sorprendeume moito e dependerá de como evolucione», insiste. Ten claro que o principal é que goce. «Lembro unhas palabras de Henry coas que me identifico: preguntábanlle que sería de non ser futbolista e el dicía que futbolista, aínda que fose en rexional. Iago é tamén moi bo estudante e o importante e que xogue o tempo que queira mentres sexa feliz».
«Non sabía que era fillo de Pablo»
O adestrador do Choco sénior, Alberto Rabadán, nunca perde de vista aos xuvenís. «Hai que telos vixiados, porque che poden axudar, e máis, tendo un persoal curto, na que pode haber lesións e pode haber que tirar deles. Gústame apostar pola xente mozo e somos un club de canteira», proclama.
Ante as baixas e as molestias en xogadores de ataque, o técnico tiña claro que Iago ía debutar. «Ten moi boa visión de xogo, é listo, colócase moi ben e para a altura que ten, é rápido, con boas pernas e tecnicamente bo», debulla. No debe, observa que debe mellorar «o nivel de forza, a preparación física para afrontar os duelos con garantías», algo que se enmarca dentro da normalidade tratándose dun xuvenil.
Cando a Couñago pregúntaselle se pai e fillo parécense no futbolístico, responde que debe contestar alguén que vise xogar a ambos. É o caso de Rabadán: «Si que se parecen. Pablo quizais era máis eléctrico e Iago é máis tranquilo no xogo, máis pausado», describe. Ademais, o adestrador asegura que ata hai mes e medio, non sabía do parentesco: «Vía a Pablo polo club e pensaba que tería algún fillo pequeno que xogaba».
Raba tiña «plena confianza» no canteirán, que antes era máis centrocampista ofensivo e ultimamente está a xogar arriba. «Máis aló do gol, que sempre chama máis a atención, o seu traballo foi excepcional». Xa avisa que seguirá contando con el.