Dúas persoas foron detidas en Lisboa despois de levar a mercancía por estrada, nunha descarga controlada por Vixilancia Aduaneira
18 jul 2025 . Actualizado á 22:17 h.Dúas persoas foron detidas en Portugal como responsables dun alixo de 400 quilos de cocaína, que traficaban mesturada con area para gatos. A mercancía chegou a Lisboa nun camión, procedente do porto de Vigo. Chegara a Galicia nun barco procedente de Sudamérica e, desde Vigo, trasladouse por estrada á capital portuguesa, segundo informou a Axencia Tributaria.
O Servizo de Vixilancia Aduaneira detectou o 6 de xuño a arribada ao porto dun colector sospeitoso. Xa existía unha alerta previa sobre ese cargamento. O colector portaba unha carga de 24.800 quilos de area de gato, remitida a unha empresa de Portugal. A alerta lanzouse porque esa empresa estaba a pedir 25 toneladas de area pero nunca importara este produto nin o vendera, segundo fontes oficiais. Os investigadores consideraron que podía ser unha sociedade instrumental.
Na aduana de Vigo, a unidade de análise de riscos inspeccionou a mercancía e todo parecía correcto, xa que ao estar mesturado con area, o po branco volvérase indetectable. Tomáronse mostras para enviar no laboratorio central da Axencia Tributaria. As análises mostraron que había presenza de cocaína basee (ou pasta de cocaína) nunha concentración do 25%.
Os investigadores do Servizo de Vixilancia Aduaneira, baixo a dirección da Fiscalía Antidroga, planearon unha entrega controlada, en conxunto coa Policia Judiciária portugesa. Executouse o 4 de xullo. O camión saíu do porto de Vigo. Chegou a unha nave na vila de Pó (municipio de Bombarral), que non chega a mil habitantes e atópase a 80 quilómetros de Lisboa. Alí foron detidas dous homes, un mentres descargaba o camión coa mercancía e outro que se atopaba nos arredores da nave.
Os axentes inspeccionaron os sacos e identificaron que en polo menos 200 deles había cocaína mesturada coa area de gato. Esta substancia ten que ser analizada, de novo, no laboratorio. Neste caso ocuparanse as autoridades portuguesas, aínda que a Axencia Tributaria estima que hai polo menos 400 quilos de droga.
Os detidos pasaron ao dispor do xulgado en Portugal.