Da creatividade dos usuarios de Apamp nace a tenda que desde esta semana abre as súas portas «online»
28 ene 2023 . Actualizado ás 22:39 h.É doado asociar a beneficencia ben intencionada cos traballos manuais que fan persoas con capacidades diferentes como terapia, pezas que logo venden en mercadillos para recadar fondos para colectivos grazas aos cales reciben asistencia e coidados. «Isto é así e foino durante moito tempo», razoa a xerente da Asociación de Persoas con Parálise Cerebral (Apamp), Conchi Somoza, pero o proxecto A Casa Rodante, que empezou nun recuncho do escaparate do centro de día situado na zona da Florida (Miguel Hernández, 1) e acaban de estrear de forma expansiva con tenda online para chegar moito máis lonxe, traballa e pivota sobre o concepto contrario, co desenvolvemento dunha marca propia, desvinculada de Apamp para este apartado dedicado á elaboración e venda de pezas de artesanía de alta calidade e unha orixinalidade extraordinaria.
A responsable da entidade que acaba de cumprir 46 anos en Vigo lembra que a artesanía e o traballo a través dela e a creatividade forman parte da súa esencia desde os inicios da asociación. «De feito o primeiro que fixemos naquel momento foi un taller de cerámica e de macramé», apunta. Somoza sinala que na arte non están tan claros os límites do atractivo das cousas, «se un obxecto é bonito, perfecto ou imperfecto, calquera peza ten ese matiz de beleza que non vai tan vinculado aos canons como noutros ámbitos», reflexiona engadindo que o que non deixa dúbidas, é que ese tipo de tarefas facilita a curiosidade e desenvolve a creatividade. «Con esa filosofía de traballo fomos desenvolvendo distintas actividades nos nosos centros. De feito levamos máis de 20 anos inscritos na Fundación Artesanía de Galicia. Todos os produtos que saen dos nosos talleres (serigrafía, cerámica, gravado, cestería, papel feito a man, cartón pedra, téxtil e encadernación) levan o seu selo», subliña. Todo ese tempo venderon obxectos que as persoas con parálise cerebral elaboran. «Pero sempre nos preguntamos se a xente os compraba porque lles gustaba o produto, ou polas persoas que os fabricaban», recoñece. Ao fío desa reflexión presentóuselles fai cinco anos a oportunidade de crear unha marca propia e dar un salto profesionalizado e dixital aproveitando unha convocatoria de axudas a Unión Europea. «Tratábase de que a marca nos diferenciase da asociación e o seu labor e identificásese só co produto. Por que?», pregúntase para contestarse a si mesma: «porque queremos que quen o adquira, fágao porque lle gusta o que compra, non por quen o fai. E se logo, ademais, sabemos quen son os seus autores, —algo que non imos ocultar nunca porque estamos moi orgullosos diso—, pois mellor, dálle un valor engadido», apostila. A xerente explica que o ano pasado iniciaron o proceso do deseño de marca e de aí, a deseñar a web e abrir a tenda online. O próximo será abrir tamén un espazo físico, de venda e tamén para formación acreditada como vía para crear emprego. «Imos dando pasitos. É un proxecto precioso, pero por agora só está deseñado sobre o papel», xustifica.
Bonecos de trapo a cerámica, alfombras tecidas a man ou gravados
Os produtos que se venden baixo a marca A Casa Rodante e o selo Artesanía de Galicia nin son posavasos feitos con pinzas da roupa vernizadas nin teñen prezo de mercadillo. Son pezas únicas que ás veces pasan polas mans dun só autor, aínda que como aclara Conchi Somoza, adoitan ser froito dun traballo colectivo no que participa un equipo de sesenta persoas xunto a un dos oito artesáns especialistas ao lado deles. Xuntos planifican os proxectos ou pezas que vaian facer.
Uns floreros de macramé para o hotel Baía foron as primeiras obras que saíron das mans dos mozos de Apamp hai 45 anos. «E as nosas primeiras feiras eran as Vigomostras aquelas que se facían», lembra a xerente, ilusionada coa estrea dunha idea que levan anos rumiando e que xa tivo colaboracións destacadas con firmas como Bimba e Lola.
Un paseo pola tenda www.acasarodante.gal que acaba de subir a persiana do portal dixital dá unha idea clara de que non se trata dun pasatempo. A serie de bonecos orixinais que os seus propios creadores bautizaron como engendros, cerámica en barro de Buño, tote bags de algodón estampadas coa técnica tradicional de Gyotaku , gravados sobre papel artesanal de algodón, alfombras e chales tecidos en tear tradicional. Todos son deseños únicos. Todos son diferentes.