As empresas das canteiras do Porriño negan que danen casas e ampáranse nos sismógrafos
VIGO
Os veciños reclaman unha valoración e medidas contra os ruídos tras unha primeira reunión sen acordo
15 abr 2021 . Actualizado ás 17:10 h.Tiñan postas todas as súas esperanzas, pero os integrantes da asociación de afectados as canteiras de Budiño saíron decepcionados da primeira reunión mantida con representantes das empresas de canteiras na zona. A idea dos veciños era poder arrincar un compromiso para que se valoren os danos das súas vivendas que eles achacan ás vibracións. Os empresarios, pola súa banda, aseguran que as medidas realizadas cos sismógrafos son aceptables.
Tampouco houbo unha resposta ao ruído que provocan as voaduras, algo para o que os afectados demandan unha solución semellante á que se dá aos veciños das casas afectadas polo ruído que provoca o aeroporto de Peinador.
Á decepción anterior sumouse o feito de que o Concello do Porriño non teña designado unha comisión de seguimento para valorar os danos, a pesar de comprometerse a iso o representante municipal asistente á reunión a tres bandas. O que si fixo a administración local é elaborar unha ordenanza de ruído, que podería dar cobertura aos veciños se leva a cabo un control da situación. O problema é saber de antemán cando se producirán as detonacións.
«Debería soar a sirena antes das voaduras, pero non se fai, e así é imposible medir o ruído e as vibracións; eles dinnos que está dentro da norma», comenta a presidenta da asociación de afectados de Budiño, Almudena Rodríguez.
Lembra que ao principio dos 2000 houbo un acordo entre ambas as partes polo que as empresas ofreceron diñeiro ás familias afectadas para reparar as súas casas. Agora estarían dispostos a aceptar unha solución deste tipo descartando unha denuncia civil, algo que nalgunha ocasión valoraron.
Os veciños prefiren, se é posible, liquidar as cousas polas boas, como xa viñeron demostrando coa paciencia que tiveron neste tempo, e lamentan que as empresas lles atribúan unha denuncia ante a fiscalía, cando en realidade foi interposta por dous grupos ecoloxistas.
«O problema é que no seu día non se fixo un estudo de impacto ambiental que permitiría aplicar as medidas correctoras; o que queremos é un programa de vixilancia ambiental», explica a portavoz dos afectados.
En definitiva, demandan maior calidade de vida e que as administracións non se pasen a pelota dunhas a outras como veu sucedendo ata agora.
Para evitar que o tema quede en punto morto a asociación xa traballa en buscar outros contactos. A idea é poder reunirse con organismos da Xunta e con outros organismos implicados para conseguir o seu apoio e acabar co problema.