A esquerda de Cangas, obrigada a negociar un novo alcalde en 10 días tras a morte de Pazos

O duelo polo inesperado falecemento do alcalde de Cangas ha de ser compatible coa continuidade da vida municipal. É unha actividade regulada e a lei establece un prazo máximo de dez días para que outro membro da corporación asuma o bastón de mando. Onte era unha situación extraordinaria e ninguén quería falar da sucesión. Pero o certo é que hai un bipartito que, con independencia do falecemento de Xosé Manuel Pazos, que actuaba como nexo de unión, non pasa polo seu mellor momento. Goberna cunha minoría de oito edís (4 de ACE e 4 do PSOE) e precisaría de apoios para manter o bastón.

Pazos non conseguiu unificar a toda a esquerda de Cangas, pero si logrou o respaldo de Avante e BNG (con tres edís cada formación) para o seu nomeamento no 2019. A acta de Xosé Manuel Pazos será asumida, en principio, por Adrián Pena, pero o enfrontamento entre Mariano Abalo (ACE) e o portavoz socialista, Eugenio Portela, tensa a reedición dun acordo e a situación podería derivar na apertura de negociacións con outras formacións, neste caso co Bloque e co grupo de Avante, para a conformación dun novo goberno.

A socialista Sagrario Martínez, que era a primeira tenente de alcalde de Pazos, tivo que asumir o cargo de rexedora en funcións na sesión plenaria máis difícil e emotiva do mandato, na que onte se decretou o loito oficial na vila. Desde os comicios do 2019 producíronse tamén moitos movementos nas filas socialistas e tres dimisións. A última, a de Hugo Fandiño o mes pasado, que se manterá como secretario xeral da agrupación municipal.

Cangas, de loito, despide ao seu alcalde

Mónica Torres / M.Moralejo (fotos e vídeos)

O Partido Popular, con 7 edís, foi a lista máis votada nas municipais. Con todo, dáse por feito que non contará con ningún apoio na esquerda para unha hipotética investidura do seu candidato.

---

---

---