O centro cultural da Deputación realiza as rutas todos os xoves e sábados ás seis da tarde
19 oct 2020 . Actualizado ás 05:25 h.Ata o 10 de xaneiro do 2021, o Museo de Pontevedra acolle a exposición O universo de Xaime Quessada. Actualmente, a dirección do centro dependente da Deputación de Pontevedra ofrece a posibilidade de realizar percorridos guiados ao redor da obra do artista ourensán. Desenvolveranse todos os xoves e sábados ás seis da tarde. Como novidade, e debido á situación sanitaria motivada polo covid-19, será necesaria a inscrición previa.
Para participar nas visitas guiadas é preciso apuntarse previamente, habendo unicamente nove prazas por sesión debido ás restricións provocadas pola pandemia. Os interesados deberán chamar ao teléfono 986 804 100 do gabinete didáctico do museo, ou formalizando a inscrición a través do correo electrónico gabinetedidactico.museo\
Ademais das visitas guiadas, o museo previu desenvolver outras accións para dar a coñecer a relevancia do artista, tales como talleres e faladoiros durante os próximos meses.
Esta exposición, a última grande prevista polo museo para este ano, é unha mostra comisariada por Pilar Corredoira na que se exhiben máis de medio centenar de obras realizadas ao longo de cinco décadas de actividade creadora e na que se reflicten dúas das características máis outorgadas ao autor: liberdade creativa e compromiso social.
Preténdese facer un percorrido polas súas obras temperás, de finais dos anos cincuenta; as da década dos sesenta, que xa revelan o artista batallador, viaxeiro e culto; e as novas creacións que van definindo as transformacións estilísticas e temáticas que teñen lugar nos anos seguintes.
Por outra banda, as visitas de carácter xeral ás coleccións do Museo continúan na súa programación habitual, de martes a venres ás 12 horas, ás 19 horas os sábados, e ás 12 horas os domingos e festivos. Non é precisa inscrición previa, pero é necesario lembrar que a capacidade nestes momentos está limitado a nove persoas como máximo polo que se garda a orde de chegada.