que extremou a seguridade contra o vandalismo
15 ago 2020 . Actualizado ás 05:00 h.O máximo responsable da actividade que se desenvolve no verán no pazo de Urzaiz e que mantén en pé de guerra aos veciños, José Domingo González Fernández, máis coñecido como Don Pepe, pide «paciencia e comprensión» ante uns feitos que el mesmo condena e que, asegura, intenta paliar. Os veciños da zona denunciaron que viven atemorizados polos mozos que saen de marcha. O empresario sostén que as molestias son de portas fóra xa que «por ruído é imposible porque a carpa está insonorizada». Aínda así, insiste en pedir perdón aos afectados e ao alcalde de Nigrán , que anunciou medidas administrativas, e ofrécese a acordar posibles medidas que minimicen o vandalismo.
González asegura que xa desde o ano pasado incrementaron a vixilancia para evitar que mozas que acoden ao pazo deambulen polas rúas. «Hai tres coches desde a un ata as seis e media da mañá para vixiar que non haxa botellóns nin reunións fose do recinto e un vixiante exclusivamente para a casa do veciño que vive máis preto», afirma. Pide compresión «nun ano excepcional no que temos que reinventarnos. Perdemos 2,5 millóns de euros polo confinamento», indica. Insiste en que extremaron as medidas de seguridade e sanitaria, con autobuses que, desde as 4.30 ata as 7.30, levan de volta aos mozos a casa «para que sexa de forma graduada e evitar molestias aos veciños». Di que xa presentaron toda a documentación para que o Concello lles dea licenza de hostalería, que teñen a de Patrimonio da Xunta e que cumpren todas as medidas sanitarias.