O concelleiro Anxo Rivas reunirase cos comerciantes de Torrecedeira
15 ago 2020 . Actualizado ás 05:00 h.As reclamacións da Asociación de comerciantes de Torrecedeira (Acemto) non caeron en saco roto. Non queren que se sigan producindo peches de negocios e pediron medidas de apoio ás administracións.
O alcalde, Abel Caballero, tendeulles a man e manifestou onte que o goberno local vai entrar en contacto con eles «para atender as súas demandas». Meu dito meu feito, o edil Anxo Rivas chamou onte aos comerciantes que van concretar con el unha reunión. Unha das demandas é a necesidade de aparcadoiro na zona para que os empresarios e os seus clientes poidan estacionar, A petición de lugares para aparcar xa foi formulada hai máis dun ano, pero entón non foi atendida porque o aparcadoiro se atopaba en mans dunha concesionaria.
Caballero manifestou que o aparcadoiro subterráneo do auditorio Mar de Vigo é agora do Concello polo cal se podería facer un convenio coa asociación de comerciantes. A entidade está articulando unha proposta de centro comercial aberto que se vai chamar Zona Vertical. Este área comercial ten vocación de expandirse a rúas adxacentes e poder chegar a súa área de influencia mesmo ata a rúa Venezuela, aproveitando os novos sistemas de mobilidade mediante ascensores e ramplas.
Carlos Fernández, presidente da asociación Acemto, sinala que van enviar un escrito á concellaría pedindo formalmente a reunión e agardan que nela se poidan solucionar cuestións que afectan a 91 comerciantes e empresarios que queiran crecer e non ter que clausurar os seus negocios e trasladarse a outro lugar. Recentemente estes empresarios expresaron o seu desexo ao Concello de que lles no exonerasen do pagamento do consumo de auga durante os meses que estiveron pechados os seus locais por culpa da pandemia. Pero esta condonación non se produciu polo que se mostran un pouquiño escépticos.