Pódese ver ata o 21 de agosto no Centro Comercial Gran Vía
11 ago 2020 . Actualizado ás 05:00 h.O Centro Comercial Gran Vía de Vigo acolle a exposición A viaxe da miña vida, da Asociación Down Vigo que se poderá visitar ata o 21 de agosto en plántaa cero. A mostra artística consta de 8 tapices de tea deseñados e confeccionados polo grupo de Habilidades Adaptativas e o equipo docente do servizo de Formación de Down Vigo no que empregaron a técnica do patchwork. Esta técnica de costura consiste en unir anacos de tea diferentes entre si para crear deseños únicos e orixinais.
A viaxe da miña vida é un proxecto emocionante que mostra a vida de cada un dos protagonistas de forma figurada. Deste xeito, o proceso de creación de cada peza xorde dunha vivencia que, mediante a combinación de cores, teas e disposición toma corpo e sentido. O resultado, son estes 8 tapices que narran aspectos íntimos da súa persoa e que recollen a súa experiencia vital.