O sector pide axuda para capear perdas do 90 % respecto da súa facturación habitual
27 jul 2020 . Actualizado ás 07:47 h.A ausencia de festas para evitar a expansión do coronavirus non só está a matar ao sector do espectáculo ou aos feirantes. Non hai verbena, romaría, acto lúdico ou relixioso que non empezo ou remate (ou ambas as cousas), con tirada de fogos artificiais. Pero o sector non está para botar foguetes e as expectativas non son nada optimistas. Corrobórao o presidente da Asociación Galega de Industrias Pirotécnicas, Argimiro Alborés, que rexenta en Camos a empresa que fundou o seu avó en 1933 e continuou o seu avó: «Perspectiva ningunha, festas suspendidas e cos traballadores no ERTE, como moito unha ducia de bombas que che piden para unha misa e pouco máis», lamenta o especialista, que aproveita para realizar labores de mantemento xa que pouco máis ten que facer desde hai meses.
Como representante do sector en Galicia manifesta que «máis ou menos, estamos todos igual. Houbo algún compañeiro que sacou a algún empregado do ERTE porque había perspectivas para o Día do Carmen, pero fíxose demasiado tarde e xa non admitiron a trámite os permisos. Non se puido facer tampouco». Alborés lembra que en Galicia son 16 as empresa dedicadas a esta actividade. Delas, catorce pertencen á asociación. Na zona de Pontevedra hai unha en Vilagarcía que pode vender pero non fabricar, un pequeno depósito en Salvaterra, outra preto da Estrada e a miña», enumera. Segundo os seus cálculos, este ano facturarán entre un 90 e un 95 % menos que o ano pasado.
«Catro misas non che dan nin para pagar aos teus traballadores nin para sobrevivir ti. Só dá para minimizar as perdas que estamos a ter, estamos a intentar aguantar pero non sabemos como, porque os gastos os seguimos tendo igual. As alarmas teñen que seguir funcionando, os extintores hai que seguir revisándoos, os seguros para cinco furgóns hai que seguir pagándoos, así como os permisos de almacenamento, fabricación, transporte e disparo», explica.
O experto engade que aínda que hai comisións de festas que a última hora quixeron intentalo, os concellos esixíanlles tantos controis que desistiron. Recaía sobre eles o labor de seguridade, vixiar que a xente leva máscara ou respectan a distancia mínima de seguridade. «E claro, decidiron non complicarse a vida». Explica o pirotécnico que a opción de non facer a festa pero si facer tiradas de fogos artificiais, -xa que a súa goce non ten por que provocar aglomeracións posto que ven e escoitan desde amplas distancias-, non se contempla. A razón é moi sinxela: as comisións de festas recadan diñeiro durante meses para todos os gastos a través de rifas, bingos e sorteos en bares que o confinamento este ano impediu.
Este ano a capacidade das naves para a campaña de verán case xa estaba, pero como aclara o experto, parouse en seco xa que non se pode seguir fabricando, «porque hai que ir facendo segundo vai fai falta». Alborés, aínda que asentado en Nigrán, móvese por toda a provincia de Pontevedra. «E todos os pobos suspenderon as súas festas», lamenta. Argimiro repasa o santoral e non lle sae nin un, nin San Pedro nin San Xoán nin a Virxe do Carmen. Esta fin de semana tivo unha mini tirada na igrexa de Candeán, tras a misa de San Cristóbal e Santiago. Tamén ten unha petición en Beade, que queren facer unha tirada pero non é o mesmo gastar 100 ou 200 euros que dous ou tres mil doutros anos. «Non lle vexo futuro a isto, falan de axudas pero onde están? Eu teño nove traballadores en ERTE ata setembro, estamos a intentar negociar para que nos deixen continuar ata fin de ano como mínimo».