Nuns meses, conmemoraremos o 40 aniversario dunha revolución, o movemento Pases prol bus, que se traduciu en dramáticos disturbios rueiros. Co pretexto de reclamar un transporte público máis económico, explotaba unha mocidade que, en 1980, sentíase desprazada nunha democracia que non remataba de arrincar. Como proba, ao ano seguinte houbo un golpe de estado.
Aquela revolta non foi menor. Os estudantes de media cidade saíron á rúa e, nos disturbios, foi esnaquizada máis da metade da flota de Vitrasa. Dos seus 119 autocares, 56 foron destruídos en apenas seis meses. Se algúns se salvaron foi porque cada día viaxaban escoltados por furgonetas policiais.
As protestas iniciáronse en setembro de 1980, con asembleas nos institutos Santa Irene, Coia 2 e Coia 4. Constituíuse unha Coordinadora Aberta de Estudantes que canalizou as queixas.
En outubro, as asembleas estendéronse a Mestría e aos institutos de Teis e O Calvario. Apareceron por toda a cidade pintadas co lema Pases prol bus. E o 27 de novembro de 1980, Vigo tivo aires de intifada ou de revolta no Ulster, con 30 autobuses esnaquizados ou incendiados. O gobernador civil trouxo desde Zamora a 100 antidisturbios que se empregaron a fondo contra os estudantes nos meses sucesivos. E a revolta diluíuse en 1981, rematado o curso.
Este venres teremos ocasión de lembralo. Porque volverá circular por Vigo o Cometa, un dos poucos vitrasas que se salvaron dunha revolta que pronto cumprirá 40 anos.