A muller, de 23 anos, ía dar a luz este mesmo mes. Está ingresada en estado grave na uci
15 sep 2019 . Actualizado ás 20:18 h.Unha nova embarazada perdeu ao seu bebé en Vigo ao ser atropelada cando cruzaba por un paso de peóns na parroquia de Cabral. Ía dar a luz este mes. A vítima, de nacionalidade uruguaia e de 23 anos, permanece ingresada en estado moi grave na uci do Hospital Álvaro Cunqueiro.
O accidente ocorreu ás 22.30 horas do venres nun paso de peóns á altura do número 125 da avenida do Tranvía. O lugar do sinistro está situado no centro sociocultural da Feira de Cabral, onde o seu marido rexenta o bar. Segundo declarou o presidente da asociación, Celso Penedo, que a acompañou ao hospital, a muller perdeu ao bebé por múltiples traumatismos e hemorraxias e os médicos retiráronllo polo método da cesárea.
A muller acababa de saír do centro social e dirixíase á súa casa no Calvario. Nese momento pasaba un coche conducido por unha muller, ao parecer a velocidade inadecuada, e arroiou á vítima, que golpeou contra o parabrisas e saíu lanzada a uns catro metros de distancia.
O presidente da asociación explicou que a moza quedou malferida. Acompañouna no hospital ata as dúas da madrugada. Alí estaban presentes a nai, a irmá e o seu compañeiro sentimental. Segundo esta testemuña, o bebé morreu cando a muller embarazada chegou ao centro sanitario en ambulancia.
O escenario do accidente é unha recta duns 200 metros pola que os coches pasan a bastante velocidade. É un paso de peóns antigo que está sinalizado pero non ten resaltes. Uns veciños declararon á TVG que o paso de peóns era pouco visible e reclamaron maiores medidas de seguridade.