O alcalde de Vigo recibe a veciños da illa de Ons contrarios á candidatura de todo o parque nacional impulsada pola Xunta
22 ago 2019 . Actualizado ás 11:04 h.O alcalde de Vigo recibiu este mércores a 60 veciños e familiares de Ons contrarios á candidatura de todo o Parque Nacional Illas Atlánticas a patrimonio da humanidade que promove a Xunta. Abel Caballero deu así un novo paso na súa cruzada para que unicamente o arquipélago de Cíes sexa recoñecido pola Unesco. O rexedor socialista valeuse do enfado dos insulars de Bueu ante as posibles restricións que implicaría a designación e apuntou que unha candidatura sen consenso social está abocada ao fracaso. O PP cargou contra Caballero por querer cargarse unha iniciativa que, en primeiro lugar, beneficia á cidade de Vigo.
Os veciños reclaman que a Xunta solucione o libre acceso dos residentes en Ons incluíndo a «familiares e amigos». Tras a reunión con Caballero, a portavoz dos insulars, María José Pérez, asegurou: «Ons non vai ser nunca xamais patrimonio da humanidade porque non reúne as condicións».
Abel Caballero aludiu a ese posicionamento para incidir en que a candidatura promovida pola Xunta non cumpre os requisitos para ser estimada pola Unesco. Ademais, acusa o Goberno autónomo de mentir á comisión que aceptou o proxecto conxunto do parque nacional ao omitir a protesta dos residentes en Ons. «Se a isto lle sumamos as verteduras de Sálvora e a xeoloxía distinta que presenta Cortegada, a candidatura está morta antes de empezar», concluíu Caballero, á vez que recalcaba que Cíes en solitario é «unha candidatura imbatible».
Este xoves Caballero enviará ao Goberno e aos representantes de todas as comunidades de España unha carta pedindo que retiren a candidatura da Xunta por unha «mentira masiva» do Goberno galego.
A campaña do rexedor vigués fixo que o PP arremeta contra el. O seu portavoz no Concello de Vigo, Alfonso Marnotes, acusa o alcalde de querer cargarse unha proposta que beneficia á cidade polo seu único interese estratéxico de confrontar coa Xunta. O PP rescatou unha proposta do PSOE no Parlamento galego do ano 2000, cando Caballero era deputado, na que os socialistas criticaban á Xunta por deixar «un parque nacional de mínimos» ao non ampliar o seu territorio, ademais da Cortegada, ás Sisargas, San Simón, as dunas de Corrubedo e outros espazos naturais.
Os populares indicaron que a Unesco xa aprobou o pasado mes de febreiro a candidatura que leva por nome Parque Nacional das Cíes-Illas Atlánticas a patrimonio da humanidade, tras recibir o visto e prace de todas as comunidades autónomas de España no 2017. E tachou de «candidatura fake» a exclusiva de Cíes. «A Caballero non lle importan nin as Cíes nin Vigo. Só lle importa el, o seu enorme ego», remachou.