Fútbol A falta de acordo co Celta evita que compitan en Segunda Pro
20 jul 2019 . Actualizado ás 11:05 h.O Atlántida Matamá continuará un ano máis na que pasa a ser a terceira categoría do fútbol feminino español tras intentar un acordo co Celta que non saíu adiante. O equipo feminino renuncia á súa praza na Segunda Pro e o presidente do club, César Casás, lamenta a situación e comparte a decepción dos seus futbolistas: «As xogadoras e o corpo técnico merecíanllo, entendo a frustración que teñen que sentir».
Tras ascender a Segunda Pro o pasado 31 de marzo, o soño de xogar na categoría de prata acabouse esfumando por falta de apoio económico. O club presidido por César Casás é unha institución humilde que se ía relacionar coa elite, pero a falta de acordo co Celta provocou a renuncia da súa praza. «Cremos que unha aproximación a eles era a mellor das opcións, pero a proposta que realizou o Celta non podiamos xestionala, xa que economicamente non chegabamos para asumir eses gastos», explica Casás.
O club presidido por Mouriño era indispensable neste proxecto de Segunda Pro pola súa inxección económica, pero a oferta resultou ser inviable para un equipo humilde como o Matamá. «O Celta era clave porque para esta categoría se requiren unhas cantidades importantes de diñeiro. A proposta que nos expuxeron non era viable para nós», debulla. Aínda así, o presidente agradece a disposición para negociar por parte do Celta : «Teño que agradecerlles que nos escoitaron desde un principio e fixéronnos unha proposta».
A directiva confiou en que o acordo se rematase concretando, por iso o club inscribiuse na competición. «Anotámonos para non perder a oportunidade de ter ao equipo na Segunda Pro », comenta. Iso si, a Federación Española estaba ao tanto da situación do Matamá e exerceu presión: «Dábannos de prazo a mañá de onte para decidir o que iamos facer. En caso de non poder participar, as sancións económicas e deportivas ían ser elevadas».
O non ascenso por falta de apoio económico é un duro pau para o club, xa que non poderán gozar dun premio que gañaron sobre o céspede. «Quixemos esgotar todas as posibilidades para poder xogar en Segunda Pro e asumiremos a multa económica. Temos a conciencia tranquila de ter feito todo o posible», subliña o presidente.
Ademais, Casás avoga por que se realice un proxecto de futuro entre os tres clubs vigueses femininos (Valladares, Sárdoma e Matamá) e o Celta : «Debemos sentarnos as partes e crear un proxecto sólido para todos. É moi difícil para nós participar en Segunda Pro . Toca sentarnos e crear un proxecto de futuro viable polo ben do fútbol feminino vigués».